Ўзбекистон ОТМ битирувчилари ишни ўртача 3 ойда топмоқда

Тошкент, Ўзбекистон (UzDaily.uz) —  Ўзбекистонда олий таълим ташкилотлари битирувчилари ўқишни тамомлагандан сўнг биринчи ишини топиши учун ўртача 2 ой 27 кун талаб этилади. Бу маълумотлар Таълим сифатини таъминлаш миллий агентлиги томонидан эълон қилинган Битирувчилар сифати индекси (BSI)нинг дастлабки натижаларида келтирилган.

Тадқиқот доирасида 170 та олий таълим ташкилотини тамомлаган 249 432 нафар битирувчининг меҳнат бозорига чиқиш натижалари таҳлил қилинган. Баҳолаш мезонларидан бири ишга жойлашиш тезлиги бўлган.

Олий таълимни тамомлагандан кейин энг тез «Таълим» йўналиши битирувчилари иш топмоқда — уларга ўртача 2 ой 4 кун керак бўлади. Иккинчи ўринда гуманитар фанлар битирувчилари бўлиб, улар биринчи ишини топиш учун ўртача 2 ой 9 кун сарфлайди.

Биринчи ишни излашнинг энг узоқ даври юридик йўналишлар битирувчилари орасида қайд этилган. Уларда бу кўрсаткич ўртача 4 ой 20 кунни ташкил этади. Меҳнатни муҳофаза қилиш ва гигиена соҳаси битирувчиларида ҳам яқин натижа қайд этилган — 4 ой 19 кун. Ижтимоий таъминот йўналишини тамомлаганларга эса ўртача 4 ой 5 кун керак бўлади.

Ҳудудлар кесимида ҳам сезиларли фарқлар мавжуд. Ишга жойлашишнинг энг қисқа ўртача муддати Қашқадарё вилоятида қайд этилган — 2 ой 8 кун. Навоий ва Андижон вилоятларида бу кўрсаткич 2 ой 9 кундан иборат.

Наманган вилоятида битирувчиларга ўртача 2 ой 14 кун, Фарғона вилоятида 2 ой 16 кун, Жиззах вилоятида 2 ой 18 кун талаб этилади. Сурхондарё вилоятида кўрсаткич 2 ой 19 кун, Хоразм вилоятида 2 ой 20 кун, Сирдарё вилоятида эса 2 ой 21 кунни ташкил қилади.

Тошкент вилоятида биринчи ишни излашнинг ўртача муддати 2 ой 23 кун, Бухоро вилоятида 2 ой 25 кунга тенг. Самарқанд вилоятида битирувчиларга ўртача 3 ой 3 кун, Қорақалпоғистон Республикасида 3 ой 7 кун, Тошкент шаҳрида эса 3 ой 13 кун талаб этилади.

Рейтингга киритилган 119 та олий таълим муассасаси орасида энг тез Қарши халқаро университети битирувчилари ишга жойлашади. Улар биринчи ишини ўртача 1 ой 4 кунда топади.

Кейинги ўринларда Тошкентдаги Вебстер университети таълим дастурларини амалга ошириш маркази — 1 ой 8 кун, Нордик халқаро университети — 1 ой 14 кун, Г. В. Плеханов номидаги Россия иқтисодиёт университетининг Тошкент филиали — 1 ой 17 кун ва Андижон давлат университети — 1 ой 18 кун билан қайд этилган.

Биринчи ишни излашнинг энг узоқ муддати ВГИКнинг Тошкент филиали битирувчиларида кузатилган — 8 ой 13 кун. Ўзбекистон Давлат хореография академиясининг Урганч филиали битирувчиларида бу кўрсаткич 6 ой 1 кунни ташкил этган.

Иш топиш муддати бўйича кейинги ўринларда И. М. Губкин номидаги Россия давлат нефть ва газ университетининг Тошкент филиали — 5 ой 21 кун, ISFT институти — 5 ой 13 кун ва Тошкент фармацевтика институти — 5 ой 10 кун натижалар билан қайд этилган.

Шу билан бирга, Битирувчилар сифати индекси тақдим этилган натижаларига кўра, ВГИКнинг Тошкент филиали битирувчиларнинг ўртача даромади бўйича биринчи ўринни эгаллаган.