Ўзбекистон Meta билан рақамли хавфсизликни муҳокама қилди

Тошкент, Ўзбекистон (UzDaily.uz) — Ўзбекистон Республикаси Истиқболли лойиҳалар миллий агентлигида Meta компанияси вакиллари билан учрашув бўлиб ўтди. Унда рақамли экотизимни ривожлантириш ва онлайн муҳитда хавфсизликни ошириш масалалари муҳокама қилинди.

Маълумотларга кўра, музокараларда Meta компаниясининг Осиё–Тинч океани минтақасида давлат сиёсати бўйича стратегия ва кампаниялар директори Бет Энн Лима ҳамда Марказий Осиё ва Мўғулистон бўйича давлат сиёсати минтақавий менежери Ерасил Калихан иштирок этди.

Томонлар хавфсиз ва барқарор рақамли муҳитни шакллантириш соҳасида конструктив мулоқотни мустаҳкамлаш ва тажриба алмашиш муҳимлигини таъкидлади. Учрашув давомида рақамли экотизимни ривожлантириш, сунъий интеллект технологияларини қўллаш, шунингдек онлайн фирибгарликка қарши кураш чоралари муҳокама қилинди.

Алоҳида эътибор рақамли маконда фойдаланувчилар хавфсизлигини таъминлаш ва технологик жараёнларни тартибга солишнинг замонавий ёндашувларини ривожлантиришга қаратилди.

Музокаралар якунида иштирокчилар шериклик муносабатларини янада ривожлантиришдан ўзаро манфаатдор эканини тасдиқлади ҳамда устувор йўналишлар бўйича ҳамкорликни кенгайтиришга тайёрлигини билдирди.