Ўзбекистон аэронавигация бўйича икки халқаро форумни биринчи бор қабул қилади

Тошкент, Ўзбекистон (UzDaily.uz) — Ўзбекистон илк бор аэронавигация соҳасидаги иккита йирик халқаро тадбирга мезбонлик қилмоқда. Тошкентда SOCEA’нинг учинчи йиллик умумий йиғилиши иш бошлади, 9 сентябрь куни пойтахтда CANSO Eurasia ANSP's Summit саммити бўлиб ўтади.

SOCEA AGM/3 тадбири Европа ва Осиё аэронавигация хизматлари провайдерлари, шунингдек, халқаро авиация ташкилотлари вакилларини бир жойга тўплади.

Йиғилиш доирасида иштирокчилар SOCEA фаолияти натижаларини, парвозлар хавфсизлигига оид долзарб масалаларни, аэронавигация хизматлари провайдерлари ўртасидаги ҳамкорликни ҳамда минтақавий платформани ривожлантиришнинг кейинги йўналишларини муҳокама қилади.

SOCEA Европа ва Осиё учун аэронавигация соҳасида мувофиқлаштириш бўйича минтақавий платформа ҳисобланади. У ҳаво ҳаракатини бошқариш соҳасида ҳамкорликни ривожлантириш, аэронавигация хавфсизлигини таъминлаш, шунингдек, ахборот ва тажриба алмашиш мақсадида ташкил этилган.

Кейинги халқаро тадбир CANSO Eurasia ANSP's Summit бўлиб, у 9 сентябрь куни Тошкентда ўтказилади.

Саммитда ҳаво ҳаракатини бошқариш (ATM) тизимларини, алоқа, навигация ва кузатув (CNS) тизимларини ривожлантириш, сунъий интеллект технологияларини қўллаш ҳамда Green ATM концепциясини ривожлантириш масалаларига эътибор қаратилади.

Иштирокчилар, шунингдек, ҳаво ҳаракати оқимларини бошқариш (ATFM), ҳаво ҳудудидан самарали фойдаланиш ва аэронавигация хизматлари провайдерлари ўртасида чегаралараро мувофиқлаштириш масалаларини кўриб чиқади.