Тошкент, Ўзбекистон (UzDaily.uz) — Қорақалпоғистондаги «Нукус» махсус саноат технопаркида янги инвестиция лойиҳаларини жойлаштириш учун 24,4 гектар бўш майдон мавжуд. Ушбу ҳудудда 10 дан ортиқ янги лойиҳани амалга ошириш ва қўшимча 1 000 та иш ўрни яратиш мумкин. Бу ҳақда Ўзбекистон Иқтисодиёт ва молия вазирлиги хабар берди.
Махсус саноат зонасининг умумий майдони 30 гектарни ташкил этади, шундан 28,4 гектари фойдаланишга яроқли. Айни пайтда бу ерда умумий қиймати 10,6 млрд сўм бўлган иккита инвестиция лойиҳаси амалга оширилмоқда. Улар учун 4 гектар ер ажратилган бўлиб, ҳар бир лойиҳага 2 гектардан тўғри келади. Лойиҳалар саноат маҳсулотларини ишлаб чиқариш ва ҳар бир корхонада 20 тадан, жами 40 та иш ўрни яратишни назарда тутади.
Бўш майдонлар зона ҳудудининг 81,3 фоизини, амалга оширилаётган лойиҳалар эса 13,3 фоизини ташкил этади. Қолган 1,6 гектар ёки ҳудуднинг 5,4 фоизи инфратузилма ва бошқа эҳтиёжлар учун ажратилган.
Вазирлик маълумотларига кўра, бўш майдонлардан самарали фойдаланиш, уларга янги инвесторларни жалб этиш ва амалга оширилаётган иккита лойиҳани ўз вақтида ишга тушириш бўйича чоралар кўзда тутилган.
