Тошкент, Ўзбекистон (UzDaily.uz) — Ўзбекистонлик гроссмейстер Нодирбек Ёқуббоев Freestyle Friday турнирида 11 тур давомида 9,5 очко жамғариб, ғолибликни қўлга киритди. Биринчи ўрин учун унга 400 доллар миқдорида пул мукофоти берилди.
Мусобақа якунларига кўра, Ёқуббоев якка ҳолда биринчи ўринни эгаллади. Иккинчи ўрин 9 очко тўплаган Ян Непомнящийга насиб этди. 8 очко жамғарган Нильс Гранделиус эса учинчи бўлди.
Турнир давомида ўзбекистонлик шахматчи тўққизта ғалабага эришди, бир марта дуранг ўйнади ва бир бор мағлубиятга учради. У мағлуб этган рақиблар орасида таниқли гроссмейстерлар Ян Непомнящий, Ҳанс Ниманн ва Гата Камский ҳам бор.
Тақдим этилган хабарда турнирнинг расмий ташкилотчилари ва ўтказилган санаси кўрсатилмаган.
