Тошкент, Ўзбекистон (UzDaily.uz) — Ўзбекистонлик боксчи Бектемир Мелиқўзиев 6 ноябрь куни Дубайда MUKA Boxing турнири доирасида ўтказилган Fury by the Sea бокс кечасининг марказий жангида тожикистонлик Кароматулло Шариповни иккинчи раундда нокаутга учратди.
Жанг ҳакамлар қароригача етиб бормади: Мелиқўзиев баҳсни муддатидан олдин якунлаш учун икки раунднинг ўзидаёқ етарли устунликка эришди. Шарипов билан жангга қадар ўзбекистонлик боксчининг профессионал рингда 17 та ғалабаси ва битта мағлубияти бор эди.
Мелиқўзиев иккинчи ўрта вазн тоифасида жанг қилади ва Жаҳон бокс ассоциацияси (WBA) версияси бўйича жаҳон чемпионилик унвони учун мажбурий даъвогар ҳисобланади.
Аввалроқ WBA амалдаги чемпион Хайме Мунгияга чемпионлик камарини ўзбекистонлик боксчига қарши ҳимоя қилиш мажбуриятини юклаган эди. Мелиқўзиевнинг навбатдаги жанги санаси ҳозирча маълум қилинмаган.
Fury by the Sea бокс кечаси Nikki Beach майдонида бўлиб ўтди. Тадбир MUKA Sports Organizing LLC компанияси томонидан ташкил этилди.
Дастурдан профессионал боксчилар, блогерлар ва бошқа яккакураш спортлари вакиллари иштирокидаги 12 та жанг ўрин олди. Спорт беллашувлари кўнгилочар дастур билан уйғунлаштирилди.
Мелиқўзиэв мухлисларга ҳам ҳаваскор, ҳам профессионал чиқишлари билан танилган. У 2016 йилда Рио-де-Жанейрода бўлиб ўтган Олимпия ўйинларида кумуш медални қўлга киритган, шундан сўнг профессионал боксга ўтган.
