Тошкент, Ўзбекистон (UzDaily.uz) — Бухоро вилоятининг Шофиркон туманида ҳуқуқни муҳофаза қилувчи органлар турар жой биноси пойдевори остига яширилган 2 кг 875 грамм марихуана моддасини аниқлади.
Тезкор тадбир вилоят божхона бошқармасининг контрабандага қарши курашиш бўлинмаси, Давлат хавфсизлик хизмати ва ички ишлар органлари томонидан олдиндан олинган маълумотлар асосида ҳамкорликда ўтказилди.
Тадбир давомида ходимлар кузатувда бўлган фуқарога тегишли турар жойни кўздан кечирди. Холислар иштирокида ўтказилган текширув чоғида бино пойдевори остига кўмилган гиёҳвандлик воситаси яширилган жой аниқланди.
Божхона органлари томонидан жиноят иши қўзғатилди. Ҳозирда тегишли тергов органлари дастлабки тергов ҳаракатларини олиб бормоқда.
