Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 25 октябрь куни Японияда бўлиб ўтган V ёзги Параосиё ўйинларида миллий терма жамоа аъзоларининг иштироки муносабати билан спортчилар, мураббийлар ва уларнинг ота-оналарини табриклади. Ўзбекистон терма жамоаси 45 та олтин, 49 та кумуш ва 51 та бронза медалини қўлга киритиб, умумжамоа ҳисобида Хитой ва Япониядан кейин учинчи ўринни эгаллади. Бу ҳақда Ўзбекистон Президенти матбуот хизмати хабар берди.
Табрикда қайд этилишича, ўйинларда Осиёнинг 45 та давлатидан 2600 нафардан ортиқ параспортчи иштирок этган. Ўзбекистон терма жамоаси Ҳиндистон, Жанубий Корея, Эрон, Таиланд ва Индонезия жамоаларидан ўзиб кетди. Ўзбекистон делегацияси қўлга киритган олтин медалларнинг ярми спортчи аёллар ҳиссасига тўғри келди.
Пауэрлифтинг бўйича Руза Кузиева олтин медални қўлга киритиб, жаҳон рекордини ўрнатди. Мадина Мухторова ва Каромат Омонова ядро улоқтириш, Шаҳина Йигиталиева найза улоқтириш, Наврўза Аҳмадова эса диск улоқтириш бўйича Осиё рекордларини янгилади. Хуршид Кодиров 100 метрга югуришда яна бир Осиё рекордини қайд этди.
Сузиш бўйича Егор Болотов 100 метрга орқа усулда сузиш ва 200 метрга комплекс сузиш мусобақаларида қитъа рекордларини ўрнатди. 16 ёшли Лолахон Кодирова 50 метрга эркин усулда сузиш бўйича Осиё рекордини янгилади. Паравелоспорт, пауэрлифтинг ва параенгил атлетика йўналишларида яна 16 нафар спортчи Параосиё ўйинлари рекордларини янгилашга муваффақ бўлди.
Дмитрий Хорлин Параосиё ўйинлари шоҳсупасига тўртинчи марта кўтарилди. Бобиржон Омонов, Ҳусниддин Норбеков, Қудратиллоҳон Маъруфхўжаев ва Фахриддин Ҳамроев учинчи марта ушбу мусобақалар совриндорлари бўлишди. Аслия Мирзаёрова, Шаҳина Йигиталиева, Гулжоной Наимова ва Руза Кузиева эса ўзларининг етакчилигини иккинчи марта тасдиқлади.
Мадина Мухторова, Наврўза Аҳмадова ва Мубинабону Халилова ушбу ўйинларнинг икки карра чемпионларига айланди. Хуршид Кодиров учта олтин медални қўлга киритди. Параосиё ўйинларида илк бор иштирок этган Егор Болотов парасузиш мусобақаларида тўртта олтин ва битта кумуш медалга сазовор бўлди.
Ўзбекистон делегацияси байроқдори, паравелоспорт бўйича жаҳон чемпионатида мамлакатга илк олтин медални келтирган Маржона Пардабоева Осиёнинг икки карра чемпиони бўлди. 15 ёшли Бобурбек Тоштемиров эса трек паравелоспорти бўйича Параосиё ўйинларида Ўзбекистон учун илк олтин медални қўлга киритди ва мамлакат тарихида ушбу мусобақаларнинг энг ёш чемпионига айланди.
«Аичи — Нагоя ареналаридаги ёрқин ғалабангиз билан сиз Янги Ўзбекистонда Паралимпия ҳаракати янги босқичга кўтарилганини бутун дунёга намоён этдингиз», — дейилади табрикда.
Президент Японияда қўлга киритилган натижалар ва орттирилган тажриба 2028 йилда Лос-Анжелесда бўлиб ўтадиган Паралимпия ўйинларига тайёргарлик кўриш учун мустаҳкам асос бўлишига ишонч билдирди.
