Минскда Ўзбекистон ва Беларус минтақалари форуми бўлиб ўтди

Тошкент, Ўзбекистон (UzDaily.uz) — 2026 йил 8 июль куни Минск шаҳрида Ўзбекистон ва Беларуснинг ИИИ Ҳудудлар форуми “Ҳудудлар ҳамкорлиги – иқтисодий ҳамкорлик драйвери” мавзусида бўлиб ўтди.

Форумнинг ялпи мажлисида икки мамлакат Бош вазирлари ўринбосарлари Юрий Шулейко ва Жамшид Хўжаев, шунингдек ҳукуматлар, ҳудудий маъмуриятлар, тегишли вазирлик ва идоралар ҳамда ишбилармон доиралар вакиллари иштирок этди.

Нутқлар давомида Беларус Ўзбекистоннинг асосий стратегик ҳамкорларидан бири экани, икки томонлама муносабатлар эса тобора амалий мазмун касб этаётгани таъкидланди.

Ҳудудлар ўртасидаги тўғридан-тўғри алоқаларни ривожлантириш, саноат кооперациясини кенгайтириш ва қўшма ишлаб чиқаришларни йўлга қўйиш масалаларига алоҳида эътибор қаратилди. Ўзбекистон ва Беларус иқтисодиётлари бир-бирини ўзаро тўлдириши, маҳсулотларни маҳаллийлаштириш, қўшилган қиймат занжирларини шакллантириш ҳамда учинчи давлатлар бозорларига чиқиш учун янги имкониятлар яратиши қайд этилди.

Форум доирасида ҳудудлараро ҳужжатлар, инвестициявий ва савдо битимларини имзолаш маросими бўлиб ўтди. Шунингдек, тадбир дастуридан саноат, қишлоқ хўжалиги, ёғочни қайта ишлаш, мебель ишлаб чиқариш ҳамда ижтимоий-гуманитар ҳамкорлик йўналишларига бағишланган мавзули сессиялар ўрин олди.