Ўзбекистонда кўчмас мулк бозори 48 фоизга ўсди

Тошкент, Ўзбекистон (UzDaily.uz) — Ўзбекистон Марказий банки 2026 йилнинг биринчи чораги бўйича кўчмас мулк бозори таҳлилий шарҳини эълон қилди. Унга кўра, ушбу даврда кўчмас мулк олди-сотдиси бўйича битимлар сони 110,1 мингтага етган бўлиб, бу ўтган йилнинг мос даврига нисбатан 48,4 фоизга кўпдир.

Энг юқори ўсиш Сирдарё вилоятида қайд этилди — 67 фоиз. Шунингдек, Тошкент шаҳрида битимлар сони 64 фоизга, Андижон вилоятида 56 фоизга, Навоий вилоятида эса 52 фоизга ошди. Регулятор баҳосига кўра, мазкур динамика ҳудудларда иқтисодий фаолликнинг кучайиши ва урбанизация жараёнларининг жадаллашувини акс эттиради.

Бозор ўсишининг асосий омиллари ипотека кредитлаш ҳажмининг кенгайиши ва аҳолининг реал даромадлари ошиши бўлди. Биринчи чоракда ажратилган ипотека кредитлари ҳажми 5,7 трлн сўмни ташкил этиб, бу 2025 йилнинг шу даврига нисбатан 29 фоизга кўпдир. Шу билан бирга, аҳолининг реал даромадлари 7,8 фоизга ўсган. Талабнинг янада ошишига 2026 йил 1 апрелдан эскроу тизими жорий этилиши ҳам туртки берди. Янги тартиблар кучга киришини кутган харидорлар фаоллиги натижасида март ойида битимлар сони кескин кўпайди.

Уй-жой нархлари ўсиши ҳам тезлашди. 2026 йил март ҳолатига кўра, бирламчи бозордаги квартиралар нархи доллар ҳисобида йиллик ифодада 8,1 фоизга, иккиламчи бозорда эса 9,4 фоизга ошди. Сўм ҳисобида эса ўсиш мос равишда 1,8 ва 3,0 фоизни ташкил қилди.

Қурилиш соҳасида ҳам юқори фаоллик сақланиб қолмоқда. Биринчи чоракда фойдаланишга топширилган уй-жойларнинг умумий майдони 3,3 миллион квадрат метрга етди. Бу ўтган йилнинг мос даврига нисбатан 6,6 фоизга кўпдир. Якка тартибдаги уй-жой қурилишининг юқори улуши сақланиб қолмоқда. Марказий банк кўп қаватли уйлар қурилиши Тошкент шаҳридан ташқари ҳудудларга ҳам кенгайиб бораётганини қайд этди. Бу мамлакатнинг бошқа ҳудудларида ҳам урбанизация жараёнлари жадаллашаётганидан далолат беради.

Ижара бозорида ҳам мўътадил ўсиш сақланмоқда. Республика бўйича ижара ставкалари йил давомида сўм ҳисобида 3,1 фоизга, доллар ҳисобида эса 9,5 фоизга ошди. Тошкент шаҳрида ижара нархларининг ўсиш суръати республика ўртача кўрсаткичидан паст бўлган.

Тошкентда ер участкалари бозорида эса нархлар пасайиши давом этди. Бир сотих ернинг қиймати бир йил ичида 6,4 фоизга арзонлади. Регулятор буни шаҳарнинг чекка ҳудудларида таклиф ҳажми ортиши билан изоҳлади.