Тошкент, Ўзбекистон (UzDaily.uz) — АҚШ Давлат котиби Марко Рубио Ўзбекистонга ташрифини якунлади.
Ўзбекистон ташқи ишлар вазири Бахтиёр Саидов ва бошқа расмий шахслар америкалик дипломатни кузатиб қўйди. Бу ҳақда Ўзбекистон ташқи ишлар вазири ўзининг Telegram-каналида хабар берди.
Ташриф дастуридан Марко Рубионинг Ўзбекистон Президенти Шавкат Мирзиёев билан музокаралари, C5+1 форматидаги ташқи ишлар вазирлари учрашуви, Кенгайтирилган стратегик шериклик мулоқотининг биринчи йиғилиши, шунингдек, Америка — Ўзбекистон бизнес ва инвестициялар кенгашининг иккинчи йиғилиши ўрин олди.
Бахтиёр Саидовнинг хабарда келтирилган баҳосига кўра, ушбу тадбирлар икки томонлама ҳамкорликни янада ривожлантириш учун асос яратди.
Қайд этилишича, эришилган келишувлар ва белгиланган устувор йўналишлар Ўзбекистон ва АҚШ ўртасидаги стратегик шерикликни амалий мазмун билан бойитишга хизмат қилади.
Томонлар эришилган келишувларни амалга ошириш бўйича биргаликдаги ишларни давом эттиришга келишиб олди.
