Тошкент, Ўзбекистон (UzDaily.uz) — Ўзбекистонда ижарага олинган автомобилни бошқариб, йўл-патруль хизмати (ЙПХ) ходимининг қонуний талабларига бўйсунмаган ва уни ҳақорат қилган талабаларга оид материаллар прокуратура органларига юборилди. Ҳодиса иштирокчилари содир бўлган воқеа акс этган видеони ижтимоий тармоқларда ҳам эълон қилган.
Ҳолат ўрганилганда, мазкур шахслар техникумда таҳсил олиши аниқланган. Таълим муассасасида уларнинг хатти-ҳаракатлари танқидий муҳокама қилинган.
Ўзбекистон Вазирлар Маҳкамасининг 2018 йил 1 декабрдаги 975-сон қарори билан тасдиқланган Низомнинг 19-бандига мувофиқ, йўл ҳаракати иштирокчилари ЙПХ ходимларининг қонуний талабларини бажариши шарт.
Ўзбекистон Республикасининг Маъмурий жавобгарлик тўғрисидаги кодекси 194-моддасида ички ишлар органлари ходимининг қонуний талабларини бажармаслик учун жавобгарлик белгиланган.
Ходимнинг ҳаракатларига рози бўлмаслик фуқароларни унинг қонуний талабларини бажариш мажбуриятидан озод этмайди. Агар фуқаро ходимнинг ҳаракатларини қонунга хилоф деб ҳисобласа, белгиланган тартибда юқори турувчи органга ёки судга шикоят қилиш ҳуқуқига эга.
Ҳодиса бўйича тўпланган материаллар қонунчиликка мувофиқ кўриб чиқиш учун прокуратурага юборилди.
