Тошкент, Ўзбекистон (UzDaily.uz) — Туризм қўмитасида халқаро тажрибага бағишланган экспертлик давра суҳбати бўлиб ўтди. Унда тоғ-чанғи курортларини яратиш ва бошқариш соҳасидаги етакчи мутахассислар, давлат идоралари, хусусий бизнес ва туризм сектори вакиллари иштирок этди.

Тадбирни Туризм қўмитаси раиси Умид Шадиев очиб берди. У ўз нутқида тоғ-чанғи курортларини ривожлантириш мамлакатнинг туристик салоҳиятини ошириш, тўғридан-тўғри хорижий инвестициялар оқимини таъминлаш ва Ўзбекистоннинг жаҳон туризм харитасидаги ўрнини мустаҳкамлашдаги стратегик аҳамиятини таъкидлади.

Тадбирнинг асосий спикери — Франциянинг Societe de Trois Vallees SA компанияси президенти Паскаль де Тьерсан бўлди. У премиум тоифадаги курортларни ташкил этиш бўйича етакчи тажрибалари билан ўртоқлашди. Ушбу доирада машҳур Куршевел курорти муваффақиятли лойиҳа сифатида намойиш этилди ва замонавий тоғ-чанғи туризми учун намуна сифатида қайд этилди.

Давра суҳбатида Ўзбекистон минтақаларида тоғ-чанғи кластерларини ривожлантириш истиқболлари алоҳида эътиборга олинди. Сессия доирасида амалга оширилаётган ташаббуслар, халқаро сайёҳларни жалб этиш ва юқори сифатли сервис яратишга қаратилган инфратузилмани шакллантириш бўйича узоқ муддатли режалар тақдим этилди.

Тадбир B2B ва B2G форматларидаги ишбилармон музокаралар билан якунланди. Томонлар потенциал лойиҳалар ва ҳамкорлик механизмларини муҳокама қилди.