Каннаваро Португалияга қарши ўйин ҳақида фикр билдирди

Тошкент, Ўзбекистон (UzDaily.uz) — Ўзбекистон миллий терма жамоаси бош мураббийи Фабио Каннаваро ЖЧ-2026 доирасидаги дебют тажрибаси, Колумбияга қарши дастлабки ўйин натижалари ҳамда Португалия терма жамоаси билан бўлажак учрашув ҳақида фикр билдирди.

Италиялик мутахассис терма жамоани жаҳон чемпионатида бошқариш унинг фаолиятидаги футболчилик давридан мутлақо фарқ қилувчи ҳиссиётларни берганини таъкидлади. Унинг айтишича, мураббий майдондан ташқарида тургани учун ўйинни анча кескинроқ қабул қилади ва барча жараёнларни тўлиқ назорат қила олмайди. Колумбияга қарши биринчи тур учрашуви натижаларини баҳолар экан, Фабио Каннаваро юқори даражада ҳар қандай эътибор сусайиши дарҳол жарима билан якунланишини қайд этди.

Шу билан бирга, мураббий натижа салбий бўлсада, иккинчи бўлимдан қониққанини билдирди. Унда Ўзбекистон футболчилари ўз ўйин услубини намойиш этишдан қўрқмагани, гол ургани ва майдонда устунлик қилишга ҳаракат қилгани таъкидланди.

Португалияга қарши иккинчи тур олдидан Фабио Каннаваро футболчиларга психологик босимни камайтиришга уринмоқда. У рақиб таркибида жаҳон миқёсидаги юлдузлар, жумладан Криштиану Роналду борлигини қайд этиб, уни сўнгги йигирма йилнинг энг буюк футболчиларидан бири сифатида Лионель Месси билан бир қаторда баҳолади.

Португалиянинг тўп назорати ва қисқа пасларга асосланган ўйин услубига қарши Ўзбекистон ҳимояда максимал интизом намоён этиши зарурлиги айтилди. Шу билан бирга, мураббий рақиб обрўсидан чўчимаслик кераклигини алоҳида таъкидлади: «Ҳа, Роналду ажойиб ўйинчи ва катта юлдуз, лекин ўйин бошланганидан кейин буларнинг барчасини унутишингиз керак. Сиз майдонда дўст эмассиз».

Турнирдаги асосий мақсад ҳақида гапирар экан, Фабио Каннаваро Ўзбекистонни тарихда ёрқин из қолдирадиган дебютант сифатида кўрмоқчи эканини билдирди. У жамоа нафақат расмий грандларга қарши кураша оладиган, балки гўзал ва тартибли футбол намойиш этадиган жамоа сифатида ёдда қолишини исташини таъкидлади.

Эслатиб ўтамиз, Ўзбекистон ва Португалия терма жамоалари ўртасидаги Гуруҳ K доирасидаги учрашув 23 июнь куни Тошкент вақти билан 22:00 да бошланади.