Тошкент, Ўзбекистон (UzDaily.uz) — Рақамли технологиялар вазирлигида Жаҳон иқтисодий форумининг (World Economic Forum — WEF) Европа ва Евроосиё билан ҳамкорлик йўналиши раҳбари Марвен Гарбаа ҳамда Europe & Eurasia – Centre for Regions, Trade & Geopolitics вакили Дитрих Джон билан учрашув бўлиб ўтди.
Учрашув давомида ЖИФ фаолиятининг устувор йўналишлари, ташкилотнинг жорий лойиҳалари, шунингдек, Ўзбекистоннинг рақамли ривожланиш соҳасидаги устувор вазифалари муҳокама қилинди.
Маълумот учун, Жаҳон иқтисодий форуми давлат органлари, бизнес, академик доиралар ва фуқаролик жамияти вакилларини бирлаштирувчи халқаро платформа ҳисобланади.
Форум глобал ва минтақавий кун тартибидаги муҳим масалалар бўйича мулоқот ва ҳамкорликни ривожлантиришга кўмаклашади. У 1971 йилда ташкил этилган бўлиб, штаб-квартираси Швейцариянинг Кологни шаҳрида жойлашган.
Музокаралар давомида Ўзбекистон ва ЖИФ ўртасидаги ҳамкорликни янада мустаҳкамлаш, истиқболли йўналишларда ҳамкорлик қилиш имкониятларини аниқлаш ва қўшма ташаббусларни ривожлантириш масалаларига алоҳида эътибор қаратилди.
Томонлар ўзаро мулоқотни давом эттириш ва ҳамкорликнинг янги йўналишларини илгари суриш бўйича фикр алмашди.
