Жанубий Кореяда Ўзбекистоннинг тўрт фуқароси ушланди
Тошкент, Ўзбекистон (UzDaily.uz) — Жанубий Кореяда Ўзбекистоннинг тўрт нафар фуқароси Сурияда фаолият юритаётган «Катиба ат-Таухид валь-Жиҳод» (КТД) террорчилик гуруҳини молиялаштириш ва унга кўмаклашишда гумонланиб ушланди. Бу ҳақда Yonhap агентлиги Кванджу полициясига таяниб хабар берди.
Тергов маълумотларига кўра, гумонланувчилардан бири, 30 ёшлар атрофидаги эркак 2025 йил апрель ойидан бошлаб гуруҳга 6,3 миллион вон миқдорида криптовалюта ўтказган. Бу қарийб 4,6 минг долларга тенг. КТД 2022 йилдан буён БМТ Хавфсизлик Кенгашининг санкциялар рўйхатига киритилган.
Терговчилар шунингдек, эркак худди шу даврда гуруҳдан криптовалюта олган, деб гумон қилмоқда. Полиция версиясига кўра, у ушбу маблағларга умумий қиймати 170 миллион вон бўлган 11 та ишлатилган автомобиль ва иккита экскаватор сотиб олган. Кейинчалик техника Сурияга юборилган.
Тергов маълумотларига кўра, гумонланувчининг КТД билан расмий алоқалари бўлмаган. Шу билан бирга, полиция унинг гуруҳ аъзоси бўлган укаси у билан боғланганидан сўнг КТДга ёрдам бера бошлаганини аниқлаган.
Эркак Интерполнинг «қизил билдиришнома»сига киритилганидан сўнг апрель ойида ушланган. Yonhap маълумотларига кўра, у ишлатилган автомобилларни экспорт қилиш билан шуғулланган компанияга раҳбарлик қилган.
Ўзбекистоннинг яна уч нафар фуқароси ишнинг асосий фигурантига кўмаклашишда гумон қилинмоқда. Хусусан, тергов улар унга ишлатилган автомобилларни топишда ёрдам берган, деб ҳисобламоқда.
Полицияда сўроқ қилинганидан сўнг уч гумонланувчига қамоққа олиш билан боғлиқ бўлмаган эҳтиёт чоралари қўлланилган.
Иш ҳолатлари бўйича тергов давом этмоқда.
