Ўзбекистон суғурта бозори 52,7 фоизга ўсди

Ўзбекистонда суғурта бозори 2026 йилнинг биринчи чорагида сезиларли ўсишни қайд этди. Истиқболли лойиҳалар миллий агентлиги (ИЛМА) чораклик ҳисоботига кўра, жорий йилнинг январь–март ойларида суғурта мукофотлари ҳажми ўтган йилнинг мос даврига нисбатан 52,7 фоизга ошиб, 4,017 трлн сўмни ташкил этди.

Бозор етакчиси 1,031 трлн сўмлик суғурта мукофотлари билан «Апех Инсурансе» компанияси бўлди.

Ҳисоботга кўра, суғурта тўловлари ҳажми 838,2 млрд сўмга етиб, 30,2 фоизга ўсди. Суғурта ташкилотларининг жами мажбуриятлари 4,41 трлн сўмни ташкил этиб, 58,8 фоизга кўпайди.

Шунингдек, соҳанинг инвестиция портфели ҳам ижобий динамикани намойиш этди. Биринчи чорак якунларига кўра, унинг ҳажми 10,34 трлн сўмга етиб, ўтган йилнинг шу даврига нисбатан 42,6 фоизга ошди.

Мамлакат бўйича йиғилган барча суғурта мукофотларининг 82,4 фоизи Тошкент шаҳри ҳиссасига тўғри келмоқда.

Суғурта мукофотларининг асосий қисмини ихтиёрий суғурта ташкил этиб, унинг улуши 83 фоизга етган. Амал қилаётган суғурта шартномалари сони эса 12,34 миллионтани ташкил этди.