Тошкент, Ўзбекистон (UzDaily.uz) — Грузия Миллий туризм маъмурияти 8 октябрь куни Тошкентда Emotions are Georgia Uzbekistan Roadshow 2026 тадбирини ўтказди.
Тадбир доирасида грузиялик туроператорлар ва меҳмонхона вакиллари ўзбекистонлик ҳамкасблари билан учрашди. Шунингдек, иштирокчиларга Грузиянинг туристик имкониятлари тақдим этилди.
Грузия томонидан тадбирда мамлакат Миллий туризм маъмурияти вакили Мака Макацария иштирок этди. Учрашувда Грузиянинг Ўзбекистондаги элчихонаси вакиллари ҳам қатнашди.
«Биз туризм соҳаларимиз ўртасидаги алоқаларни янада мустаҳкамлаш, бизнес учун янги имкониятлар яратиш ва мамлакатларимиз ўртасидаги саёҳатларга кўпроқ одамларни жалб қилиш учун катта салоҳият мавжудлигини кўрмоқдамиз», — деди Мака Макацария.
Унинг сўзларига кўра, туризм фақат рақамлардан иборат эмас. «Туризм — бу одамлар, алоқалар ва ҳамкорликдир. Бугунги тадбирнинг аҳамияти ҳам айнан шунда», — дея таъкидлади у.
Макацариянинг қайд этишича, роуд-шоуда грузиялик туроператорлар ва меҳмонхона вакилларининг иштирок этиши ўзбекистонлик ҳамкасблар билан учрашиш ва икки томонлама муносабатларни ривожлантириш учун яхши имконият яратади.
Тадбир меҳмонларига «Грузия: унга кам одам ташриф буюради, аммо уни сиз кашф этасиз» номли видеоролик намойиш этилди. Макацариянинг айтишича, роликда мамлакат бугунги кунда тарғиб қилаётган асосий туристик таассуротлар ва маҳсулотлар жамланган, шунингдек, Грузия таклиф қилиши мумкин бўлган имкониятларнинг хилма-хиллиги акс эттирилган.
Унинг таъкидлашича, видеоролик Грузия сайёҳлар томонидан қандай кашф этилишини исташини кўрсатади. Яъни мамлакатни шунчаки саёҳат йўналиши сифатида эмас, балки ўрганиш, ҳис қилиш ва ёдда сақлаш истагини уйғотадиган юрт сифатида намоён этади.
Роуд-шоу доирасида Centrum Air авиакомпанияси вакили Грузияга амалга ошириладиган парвозлар дастури ҳақида маълумот берди. Қишки мавсумда авиакомпания Тошкентдан Тбилисига ҳафтасига икки марта — душанба ва жума кунлари рейсларни амалга оширади.
Батумига парвозлар эса ёзги мавсумда бажарилади. Жорий йилнинг ёз фаслида ушбу йўналиш бўйича ҳафтасига бешта рейс амалга оширилган.
Кеча грузин миллий таомлари тақдим этилган гала-кечки овқат билан якунланди.
