Тошкент, Ўзбекистон (UzDaily.uz) — Ўзбекистонда Golden Gate Ventures томонидан Марказий Осиёдан стартап асосчилари учун икки йиллик қўллаб-қувватлаш дастурини ишга тушириш режалаштирилмоқда.
Бу ҳақда фонднинг бошқарув ҳамкори Майкл Линтс ICT WEEK Uzbekistan 2026 доирасида маълум қилди.
Дастур Ўзбекистонда амалга оширилади ва 20 нафар стартап асосчисига мўлжалланган. Иштирокчилар менторлик кўмагидан ҳамда Осиё, Яқин Шарқ, АҚШ ва Европадан тадбиркорларни бирлаштирувчи Golden Gate Ventures халқаро ҳамжамиятига кириш имкониятидан фойдаланади.
Дастурнинг асосий вазифаларидан бири компанияларни ривожлантириш ва уларнинг халқаро бозорларга чиқишига кўмаклашишдан иборат бўлади. Қўллаб-қувватлаш формати иштирокчиларнинг тадбиркорлар ва фонднинг халқаро стартап экотизими вакиллари билан ўзаро ҳамкорлигини назарда тутади.
Майкл Линтснинг сўзларига кўра, Golden Gate Ventures яқинда Тошкентда ўз офисини очган. Дастурни расман ишга туширишни IT Park Uzbekistan билан ҳамкорликда ўтказиш режалаштирилмоқда.
Иштирокчиларга қўйиладиган аниқ талаблар, аризаларни қабул қилиш муддатлари ва саралаш тартиби ҳозирча эълон қилинмаган.
