Тошкент, Ўзбекистон (UzDaily.uz) — Ўзбекистоннинг Фарғона вилояти 2026 йилда Швейцария билан ҳамкорликдаги қўшма лойиҳалар доирасида 35 млн долларлик инвестицияларни ўзлаштирди.
Томонлар ўртасидаги ўзаро савдо ҳажми 2,1 млн долларни ташкил этди. Иқтисодий ҳамкорликни янада кенгайтириш истиқболлари вилоят ҳокими Хайрулло Бозоров ва Швейцариянинг Ўзбекистондаги элчиси Симон Гигер ўртасида муҳокама қилинди.
Учрашув давомида томонлар янги инвестиция лойиҳаларини амалга ошириш, савдо-иқтисодий алоқаларни мустаҳкамлаш ва Швейцария бизнесининг вилоятдаги иштирокини кенгайтириш имкониятларини кўриб чиқдилар.
Қишлоқ хўжалиги, мева-сабзавот маҳсулотлари экспорти, фармацевтика ва саноат, жумладан, тўқимачилик соҳаларидаги ҳамкорликка алоҳида эътибор қаратилди. Шунингдек, малакали мутахассислар тайёрлаш ва минтақалараро алоқаларни ривожлантириш масалалари муҳокама қилинди.
Симон Гигер Фарғона вилоятининг табиий манзаралари, ҳунармандчилик анъаналари, маданий ҳаёти ва иқтисодий салоҳияти унда катта таассурот қолдирганини таъкидлади.
Музокаралар давомида Fitch Ratings ва S&P Global Ratings халқаро рейтинг агентликлари томонидан вилоятга берилган рейтинг баҳоларининг аҳамияти ҳам қайд этилди.
Учрашув иштирокчиларининг фикрича, бундай рейтинг баҳолари вилоятнинг инвестициявий жозибадорлигини ошириш ва халқаро ҳамкорлик имкониятларини кенгайтиришга хизмат қилади.
Айни пайтда Фарғона вилоятида Швейцария капитали иштирокидаги олтита корхона фаолият юритмоқда.
Учрашув якунида томонлар ўзаро манфаатли ҳамкорликни янги йўналишларда ривожлантириш ва мунтазам мулоқотни давом эттиришга келишиб олдилар.
