Тошкент, Ўзбекистон (UzDaily.uz) — Андижон вилоятидаги «Дўстлик» чегара божхона постида дастлабки қиймати 1 млрд 135 млн сўмлик декларация қилинмаган товарлар туркуми аниқланди.
Божхона ходимлари юк ҳужжатлари ва электрон декларацияларни ўрганиш жараёнида олиб ўтилаётган юкларнинг мазмунига нисбатан шубҳа пайдо бўлган. Транспорт воситалари текширувдан ўтказиш учун «қизил» йўлакка йўналтирилган.
Божхона кўриги давомида ҳамроҳлик ҳужжатлари ва декларацияда кўрсатилмаган товарлар аниқланган.
Жумладан, 23 минг дона велосипед шиналари ҳамда электр мотороллерлар учун мўлжалланган 2 200 дона қўрғошинли аккумуляторлар аниқланган.
Аниқланган товарлар вақтинча сақлаш жойига жойлаштирилди.
Мазкур ҳолат юзасидан текширув ўтказилмоқда. Текширув якунлари бўйича ҳолатга тегишли ҳуқуқий баҳо берилади.
