Тошкент, Ўзбекистон (UzDaily.uz) — Чорвоқ сув омборида 2 сентябрь куни юз берган бахтсиз ҳодиса оқибатида ҳалок бўлган уч кишини қидириш ишлари якунланди. Фавқулодда вазиятлар вазирлиги ғаввослари ҳалок бўлган учинчи шахснинг жасадини бугун соат 13:35 да аниқлади.
Фожиа Тошкент вилояти Бўстонлиқ туманида оиланинг катерда сайр қилиши вақтида содир бўлган. Эркаклардан бири чўмилиш учун сувга тушган, бироқ қутқарув жилети бўлмагани сабабли чўка бошлаган. Унга ёрдам бериш учун акаси ва отаси ҳам сувга сакраган. Натижада учаласи ҳам ҳалок бўлган.
Жасадларнинг биринчиси — кичик ўғилники — қутқарувчилар томонидан 9 сентябрь куни топилган. Бугун иккинчи ўғил ва унинг отасининг жасадлари ҳам аниқланди.
Қидирув ишлари Фавқулодда вазиятлар вазирлиги ҳузурида махсус ташкил этилган штаб кучлари томонидан олиб борилди. Ишларга қўшимча равишда Жиззах ва Сирдарё вилоятлари фавқулодда вазиятлар бошқармаларининг куч ва воситалари ҳам жалб қилинди. Қидирув жараёнида замонавий махсус ускуналардан ҳам фойдаланилди.
Фавқулодда вазиятлар вазирлиги Чорвоқ сув омборининг ҳажми ва чуқурлиги катта бўлишига қарамай, ҳалок бўлган уч кишининг жасадларини нисбатан қисқа вақт ичида аниқлашга муваффақ бўлинганини таъкидлади.
Фуқароларга сув ҳавзалари яқинида хавфсизлик қоидаларига риоя қилиш тавсия қилинди.
