Британиянинг bp компанияси Шимолий Устюрт нефть ва газ лойиҳасига қўшилди

Тошкент, Ўзбекистон (UzDaily.uz) — Британиянинг bp энергетика компанияси Қорақалпоғистон Республикасидаги олтита нефть ва газ блокларини қамраб олувчи Ўзбекистондаги Шимолий Устюрт лойиҳаси бўйича маҳсулот тақсимоти тўғрисидаги битимга расман қўшилди.

Мазкур битим Қорақалпоғистон Республикасининг Устюрт минтақасида жойлашган Бойтерак, Теренгқудуқ, Бирқори, Ҳарой, Қорақалпоқ ва Қулбой блокларини қамраб олади.

Тошкент шаҳрида ўтказилган “Ўзбекистон нефть ва гази – 2026” халқаро конференцияси доирасида имзоланган келишувда Ўзбекистон Республикаси Энергетика вазири Жўрабек Мирзамаҳмудов, «Ўзбекнефтгаз» АЖ бошқарув раиси Абдуғани Сангинов, Озарбайжон Республикасининг SOCAR компанияси президенти Ровшан Нажаф ҳамда «bp» компаниясининг Озарбайжон, Грузия ва Туркия бўйича минтақавий президенти Джиованни Кристофоли иштирок этди.

Мазкур лойиҳа компаниянинг Ўзбекистондаги илк ташаббуси бўлиб, у «Ўзбекнефтгаз» ва SOCAR билан ҳамкорликда амалга оширилади.

Катта ресурс салоҳиятига эга булган ушбу лойиҳа нефть-газ ресурсларини қидириш ва ўзлаштириш ишларини амалга ошириш ва узоқ муддатли манфаатлар яратишга хизмат қилади. Шунингдек, мазкур маҳсулот тақсимотига оид битим (МТБ) «bp» компаниясининг кидирув портфелини кенгайтириш ва узоқ муддатли ўсиш стратегиясининг муҳим қисми экани қайд этилди.

Битимдаги томонларнинг улушлари қуйидагича белгиланган: «bp» компанияси – 40 фоиз, «SOCAR» компанияси – 30 фоиз ва «Ўзбекнефтгаз» АЖ – 30 фоиз.

Ушбу МТБ дастлаб 2025 йил 24 июль куни Ўзбекистон Республикаси Энергетика вазирлиги, «Ўзбекнефтгаз» ва SOCAR ўртасида имзоланган. Айни пайтда лойиҳа биринчи босқичда бўлиб, SOCAR оператор сифатида сейсмик қидирув ишларини олиб бормоқда.