Тошкент, Ўзбекистон (UzDaily.uz) — Ўзбекистон Президенти матбуот котиби Шерзод Асадов Шавкат Мирзиёевнинг Жанубий Кореяга давлат ташрифи ҳамда «Марказий Осиё – Корея Республикаси» биринчи саммити доирасида бўлиб ўтган учрашув ва тадбирлар ҳақида сўзлади. Бу ҳақда у ижтимоий тармоқларда маълум қилди.
Асадовнинг сўзларига кўра, Президент ташрифи давомида Марказий Осиё давлатлари раҳбарлари билан учрашувлар ўтказилиб, икки томонлама муносабатлар ва ҳамкорликнинг янги режалари муҳокама қилинди. У давлат раҳбарлари ўртасидаги ишонч ва эркин мулоқот муҳитига алоҳида эътибор қаратди.
Пресс-котиб Мирзиёевнинг Корея Республикасининг Ўзбекистондаги собиқ элчиси Ли Ук Хён билан учрашуви ҳақида ҳам алоҳида тўхталди. Суҳбат давомида улар Ўзбекистон ва Корея муносабатларини мустаҳкамлаш бўйича биргаликда ишлаган йилларни ёдга олдилар.
Саммит арафасида Мирзиёев Корея Республикаси Миллий ассамблеяси спикери учун корейс тилига таржима қилинган «Мирзиёев доктринаси» китобини имзолаб берди.
Давлат ташрифи доирасида Корея томони бир қатор миннатдорчилик ёрлиқларини тайёрлади. Ўзбекистон байроғи Жанубий Кореянинг энг баланд биноси — Lotte World Tower ҳамда Сеул телеминорасида жойлаштирилди.
Бундан ташқари, шаҳар осмонида Ўзбекистон байроғи рангларидаги дирижабль пайдо бўлди, резиденция олдидаги фавворада эса Ўзбекистон давлат герби ва байроғининг ёруғлик тасвирлари намойиш этилди.
Асадовнинг таъкидлашича, ташриф давомидаги ушбу эътибор белгилари мезбон томоннинг меҳмондўстлиги ва Ўзбекистонга бўлган ҳурматини намоён этган.
