АҚШ яна ўн нафар Ўзбекистон фуқаросини депортация қилади

Тошкент, Ўзбекистон (UzDaily.uz) — Шу ҳафтада Нью-Йоркдан Тошкентга яна ўн нафар Ўзбекистон фуқаросининг депортация қилиниши кутилмоқда. Бу ҳақда республика Ташқи ишлар вазирлиги матбуот котиби Аҳрор Бурҳанов маълум қилди.

Аслида, АҚШ ҳокимияти мазкур фуқароларни Коста-Рикага юборишни режалаштирган эди. Бироқ, Ўзбекистон ва АҚШ томонлари ўртасидаги музокаралар натижасида уларни ватанга қайтариш бўйича келишувга эришилди.

Бундан аввал, 24 феврал куни, АҚШ Коста-Рикага депортация қилишни режалаштирган яна етти нафар ўзбекистонлик фуқаро ватанга қайтарилган эди.

Охирги ҳафталарда АҚШ бир нечта депортация рейсларини амалга ошириб, Осиё мамлакатларидан, жумладан Ўзбекистондан ҳам юзлаб мигрантларни Панама ва Коста-Рикага юборган.

Вазият юзасидан изоҳ берган ТИВ Ўзбекистон фуқароларининг хавфсиз қайтиши таъминланишини маълум қилди. Шунингдек, вазирлик АҚШ ва Лотин Америкаси давлатлари ҳокимиятлари билан доимий мулоқотда эканлигини таъкидлади.

ТИВ шунингдек, АҚШдаги Ўзбекистон дипломатик ваколатхоналари ўз ватандошларига, улар қаерда бўлишидан қатъи назар, ҳар томонлама ёрдам кўрсатишга тайёр эканлигини қайд этди.