18 июлдан Тошкент — Бекобод йўналишида янги электропоезд қатнайди

Тошкент, Ўзбекистон (UzDaily.uz) — «Ўзбекистон темир йўллари» компанияси 18 июлдан Тошкент — Бекобод — Тошкент йўналиши бўйича янги электропоезднинг мунтазам ҳаракатини йўлга қўяди. №7050/7049 рақамли йўловчи қатнови ҳар куни амалга оширилади.

Поезд Янгийўл, Чиноз, Сирдарё, Гулистон, Янгиер ва Хаваст орқали ҳаракатланади. Бекободдан поезд соат 6:00 да йўлга чиқиб, Тошкентга соат 9:16 да етиб келади. Қайтиш йўналишида эса поезд Тошкентдан соат 18:34 да жўнаб, Бекободга соат 21:38 да етиб боради.

Чипта нархи катталар учун 15 минг сўм, болалар учун эса 9 минг сўм этиб белгиланган.

ЭП3Д русумидаги янги электропоезд олтита вагондан иборат бўлиб, кондиционерлар, мобиль қурилмаларни қувватлаш учун USB портлари, симсиз интернет ҳамда ногиронлиги бўлган йўловчилар учун кўтариш мосламалари билан жиҳозланган.

Ўзбекистон Президенти Шавкат Мирзиёев 13 июль куни Бекободга амалга оширган ишчи ташрифи чоғида ушбу янги электропоезд билан танишиб, Тошкентдан Бекободгача унда сафар қилган эди.

Поезднинг энг юқори тезлиги соатига 120 километрни ташкил этади. У бир вақтнинг ўзида 586 нафар йўловчини ташиш имкониятига эга. Кутилишича, ҳар куни ундан тахминан 1 минг нафар йўловчи фойдаланади, йиллик йўловчи оқими эса 300 минг нафаргача етади.

Жорий йилнинг май ойида Тошкент вилоятида Нурафшон — Бекобод — Янгиер темир йўл тармоғи қурилиши бошланган эди. Лойиҳа доирасида тўртта янги станция, 21 та йўл ўтказгич, олтита кўприк ва битта ярим тортиш станциясини барпо этиш назарда тутилган.