Toshkent, O’zbekiston (UzDaily.uz) — Fuqarolarning «Xalq banki»dan Pensiya jamg‘armasiga o‘tkazilgandan keyin jamg‘arib boriladigan pensiya mablag‘larini investitsiya kompaniyalariga boshqaruvga berish rejalashtirilmoqda.
Bu haqda 25 sentyabr kuni Iqtisodiyot va moliya vazirligi huzuridagi byudjetdan tashqari Pensiya jamg‘armasi ijrochi direktori Murodbek Atajanov pensiya islohoti loyihasiga bag‘ishlangan matbuot anjumanida maʼlum qildi.
Atajanovning so‘zlariga ko‘ra, birinchi bosqichda jamg‘arib boriladigan mablag‘lar Pensiya jamg‘armasiga o‘tkaziladi. Bunda jamg‘arib boriladigan pensiya tizimi va Pensiya jamg‘armasi alohida yuridik shaxs maqomini saqlab qoladi. Ular uchun mustaqil kuzatuv kengashlari va boshqaruv organlari, shuningdek, alohida strategik va institutsional siyosat nazarda tutilgan.
Kuzatuv kengashi tarkibiga mahalliy hokimiyat organlari vakillari, biznes sohasi va xorijiy ekspertlarni kiritish rejalashtirilmoqda. Pensiya mablag‘larini boshqarish va investitsiya siyosati bo‘yicha qarorlarni aynan ushbu organ qabul qiladi, Iqtisodiyot va moliya vazirligi emas, dedi Atajanov.
Shu bilan birga, keyinchalik jamg‘arilgan mablag‘larni boshqaruvga berish rejalashtirilayotgan investitsiya boshqaruv kompaniyalarini tanlash uchun tanlov o‘tkazish ko‘zda tutilmoqda. Pensiya jamg‘armasi rahbarining so‘zlariga ko‘ra, dastlabki bosqichda mablag‘larni bir joyda jamlash zarur.
Pensiya islohoti loyihasida 2027 yildan boshlab jamg‘arib boriladigan pensiya tizimini «Xalq banki»dan Pensiya jamg‘armasi tasarrufiga o‘tkazish nazarda tutilgan.
Loyihaga ko‘ra, fuqarolarning jamg‘arib boriladigan hisobvaraqlaridagi mablag‘lar, jumladan, davlat byudjetidan ajratiladigan qo‘shimcha to‘lovlar va ijtimoiy soliq mablag‘lari, shuningdek, jamg‘armalarni investitsiya va moliyaviy instrumentlarga joylashtirishdan olinadigan daromadlarni fuqarolarning shaxsiy mulki deb hisoblash taklif etilmoqda. Ushbu mablag‘larni meros qilib qoldirish huquqini ham saqlab qolish rejalashtirilmoqda.
Pensiya islohoti to‘g‘risidagi farmon loyihasining jamoatchilik muhokamasi 30 sentyabrga qadar davom etadi.
