Toshkent, O’zbekiston (UzDaily.uz) — “O‘zbekneftegaz” AJ 800 mingta xalqaro I-REC(E) “yashil” energiya sertifikatini xarid qildi. Bu kompaniya isteʼmol qilgan elektr energiyasining qayta tiklanuvchi manbalardan olinganini tasdiqlaydi. Bu haqda “O‘zbekneftegaz” AJ matbuot xizmati xabar berdi.
Xarid qilingan sertifikatlar O‘zbekiston hududida qayta tiklanuvchi energiya manbalaridan 800 mln kVt·soat elektr energiyasi ishlab chiqarilganiga ekvivalent.
Kompaniya maʼlumotlariga ko‘ra, I-REC(E) sertifikatlaridan foydalanish isteʼmol qilinayotgan elektr energiyasining kelib chiqishini rasman tasdiqlash va kompaniyaning o‘z energiya isteʼmolini qayta tiklanuvchi manbalar bilan bog‘lash imkonini beradi.
Sertifikatlarni hisobga olish doirasida parnik gazlari chiqindilari hajmi 580,8 ming tonna CO₂ga ekvivalent miqdorda qisqartirildi.
“O‘zbekneftegaz”da taʼkidlanishicha, I-REC(E) sertifikatlari nafaqat ekologik ko‘rsatkichlarni tasdiqlash vositasi, balki isteʼmol qilinayotgan elektr energiyasining kelib chiqishini hujjatlar asosida qayd etish imkonini ham beradi.
Kompaniya tasdiqlangan energiya isteʼmoli to‘g‘risidagi maʼlumotlardan xalqaro investorlar, xorijiy hamkorlar va reyting agentliklariga ekologik, ijtimoiy va korporativ boshqaruv (ESG) sohasidagi ko‘rsatkichlar haqida axborot taqdim etishda foydalanishi mumkin.
Kompaniya hisoblashicha, sertifikatlarni xarid qilish “yashil” iqtisodiyot tamoyillarini joriy etish, ekologik masʼuliyatni oshirish va faoliyatni barqaror rivojlanish sohasidagi xalqaro talablarga moslashtirish yo‘lidagi navbatdagi amaliy qadam bo‘ldi.
