O‘zbekistonga pul o‘tkazmalari 3,8 mlrd dollarga yetdi

Toshkent, O’zbekiston (UzDaily.uz) — 2026 yilning birinchi choragi yakunlariga ko‘ra, O‘zbekistonga pul o‘tkazmalari hajmi 3,8 mlrd AQSH dollarini tashkil etdi. Bu o‘tgan yilning shu davriga nisbatan 13 foizga ko‘p. Bu haqda Markaziy bank tomonidan eʼlon qilingan mehnat bozori sharhida maʼlum qilindi.

Shu bilan birga, pul o‘tkazmalarining geografiyasidagi o‘zgarishlar davom etdi. Rossiyaning umumiy tushumlar hajmidagi ulushi 2025 yil birinchi choragidagi 77,6 foizdan 72,4 foizgacha pasaydi. Bu 2,75 mlrd AQSH dollariga teng.

Markaziy bank ushbu tendensiyani yil boshidan xorijlik mehnat muhojirlari uchun patent narxlarining oshirilishi, mart oyida Rossiya rublining nisbatan qadrsizlanishi hamda O‘zbekiston fuqarolarining mehnat migratsiyasi geografiyasi kengayishi bilan izohladi.

Shu fonda boshqa davlatlardan kelgan pul o‘tkazmalari ulushi oshdi. Xususan, Qozog‘istonning ulushi 3,1 foizdan 4,1 foizgacha ko‘tarildi va ushbu mamlakatdan 155,8 mln AQSH dollari miqdorida mablag‘ kelib tushdi.

Janubiy Koreya ham xuddi shunday — 4,1 foiz ulushga ega bo‘lib, ushbu mamlakatdan ham 155,8 mln AQSH dollari o‘tkazildi. Yevropa davlatlarining ulushi 2,3 foizdan 3,3 foizgacha o‘sdi, bu 125,4 mln AQSH dollariga teng. Qolgan davlatlarning umumiy ulushi esa 13,6 foizdan 16,2 foizgacha oshib, 615,6 mln AQSH dollari tushumini taʼminladi.

Regulyator maʼlumotlariga ko‘ra, birinchi chorakda Rossiyada patent asosida mehnat qilgan O‘zbekiston fuqarolari soni 1,34 mln nafarni tashkil etdi. Bu avvalgi chorakka nisbatan 8,8 foizga, o‘tgan yilning shu davriga nisbatan esa 1,8 foizga kam.

Markaziy bank bu dinamikani mavsumiy omillar hamda tashqi mehnat bozoridagi vaziyat o‘zgarishi bilan bog‘ladi.

Shu bilan bir vaqtda boshqa mamlakatlarga mehnat migratsiyasi o‘sishda davom etmoqda. Turkiyada O‘zbekiston fuqarolariga berilgan rasmiy ishlash ruxsatnomalari soni qariyb 70 mingtaga yetdi, bu o‘tgan yilning birinchi choragiga nisbatan 14 foizga ko‘pdir. Janubiy Koreyada mehnat qilayotgan o‘zbekistonliklar soni ham o‘sib, 99,6 ming nafarga yetdi.

Umuman olganda, aholining xalqaro harakatchanligi ijobiy surʼatlarni saqlab qolmoqda. 2026 yilning dastlabki uch oyida 1,63 mln nafar O‘zbekiston fuqarosi mamlakat tashqarisiga chiqqan bo‘lib, bu o‘tgan yilning mos davriga nisbatan 11,6 foizga ko‘pdir. Shu bilan birga, havo yo‘lovchi tashuvlari hajmi 32 foizga oshib, 2,25 mln nafarga yetdi.