Toshkent, O’zbekiston (UzDaily.uz) — O‘zbekistonda ishdan bo‘shatilgan ayrim toifadagi xodimlarga uch oy davomida munosib ish topish imkoni bo‘lmasa, yoshga doir muddatidan oldin pensiya tayinlanishi mumkin.
Tegishli tartib 2026 yil 28 sentyabrdagi Vazirlar Mahkamasi qarori bilan tasdiqlangan.
Muddatidan oldin pensiya olish huquqi 58 yoshdan 60 yoshgacha bo‘lgan, mehnat staji kamida 25 yilni tashkil etuvchi erkaklarga beriladi. Ayollar uchun yosh chegarasi 53 yoshdan 55 yoshgacha bo‘lib, zarur mehnat staji kamida 20 yilni tashkil etishi kerak.
Muddatidan oldin pensiyani rasmiylashtirish uchun fuqaro Yagona interaktiv davlat xizmatlari portali orqali ariza berishi lozim. Arizaga mehnat shartnomasini bekor qilish to‘g‘risidagi buyruq nusxasi ilova qilinadi. Agar mehnat stajiga oid maʼlumotlar hali to‘liq elektron shaklga o‘tkazilmagan bo‘lsa, qo‘shimcha ravishda mehnat daftarchasining nusxasi talab etiladi.
Hujjatlar topshirilganidan so‘ng, mahalliy bandlik masalalari bo‘yicha organ ikki ish kuni davomida taqdim etilgan maʼlumotlarni tekshiradi va fuqaroni ish qidirayotgan shaxs sifatida ro‘yxatga oladi.
Keyingi uch oy davomida bandlik xizmati mutaxassislari unga munosib ish qidiradi. Agar ushbu davrda ishga joylashish imkoni bo‘lmasa, fuqaro ishsiz deb eʼtirof etiladi. Shundan so‘ng muddatidan oldin pensiya tayinlash uchun hujjatlar Pensiya jamg‘armasiga yuboriladi.
Muddatidan oldin pensiyani rasmiylashtirish bo‘yicha davlat xizmati bepul ko‘rsatiladi.
Pensiya tayinlanganidan so‘ng ishsizlik nafaqasini to‘lash keyingi oydan boshlab to‘xtatiladi.
