Toshkent, O’zbekiston (UzDaily.uz) — O‘zbekiston Bosh vazir o‘rinbosari, iqtisodiyot va moliya vaziri Jamshid Qo‘chqorov 6 oktyabr kuni Osiyo taraqqiyot bankining (OTB) O‘zbekistondagi vakolatxonasi rahbari Kanokpan Lao-Arayya bilan uchrashuv o‘tkazdi.
Muzokaralarda, shuningdek, OTB mamlakat operatsiyalari rahbari Mirzo Iskandar Gulyamov, bankning katta iqtisodchisi Sherzod Akbarov va tomonlarning boshqa vakillari ishtirok etdi.
Uchrashuvda hamkorlikni kengaytirish, amalga oshirilayotgan qo‘shma tashabbuslarni ro‘yobga chiqarish va yangi loyihalarni tayyorlash masalalariga asosiy eʼtibor qaratildi.
Muhokamaning alohida yo‘nalishlaridan biri yarimo‘tkazgichlar sanoati va mikroelektronikani rivojlantirish bo‘ldi.
Tomonlar O‘zbekistonning innovatsion salohiyatini oshirish, shuningdek, ushbu yo‘nalishlarni rivojlantirish uchun xalqaro tajriba va texnik ko‘makni jalb qilish imkoniyatlarini ko‘rib chiqdi.
Bundan tashqari, uchrashuv ishtirokchilari sunʼiy intellekt texnologiyalarini iqtisodiy jarayonlarga joriy etish va raqamli transformatsiyani jadallashtirish masalalarini muhokama qildi.
Kun tartibidan davlat-xususiy sheriklik asosida amalga oshirilayotgan infratuzilmaviy va ijtimoiy-iqtisodiy loyihalar ham o‘rin oldi.
Tomonlar bunday tashabbuslarda xususiy sektor ishtirokini kengaytirish imkoniyatlarini ko‘rib chiqdi.
Uchrashuv yakunlari bo‘yicha O‘zbekiston va OTB mamlakatning iqtisodiy va texnologik rivojlanishiga qaratilgan yangi tashabbuslar ustida amaliy hamkorlik va qo‘shma ishlarni davom ettirish niyatini tasdiqladi.
