Toshkent, O’zbekiston (UzDaily.uz) — O‘zbekiston terma jamoasi shaxmat bo‘yicha Jahon Olimpiadasida ikkinchi bor g‘olib bo‘ldi. Samarqandda o‘tkazilgan 46-Olimpiadada o‘zbekistonlik shaxmatchilar ochiq turnirda oltin medallarni qo‘lga kiritdi.
11-turdan iborat musobaqaning yakuniy turida O‘zbekiston terma jamoasi Ukraina bilan bahslashdi. Nodirbek Yakubboyev Igor Samunenkov bilan durang o‘ynadi, Muhiddin Madaminov Roman Dixtyaryov ustidan g‘alaba qozondi. Javohir Sindarov Vasil Ivanchuk bilan ochkolarni bo‘lishdi, Nodirbek Abdusattorov va Igor Kovalenko o‘rtasidagi partiya ham durang bilan yakunlandi.
Shu tariqa, O‘zbekiston terma jamoasi Ukraina ustidan 2,5:1,5 hisobida g‘alaba qozonib, musobaqani 20 ochko bilan yakunladi.
O‘zbekiston Ukraina bilan uchrashuv yakunlanishidan oldinyoq birinchi o‘rinni o‘ziniki qilib qo‘ygan edi. Bunga Hindistonning Vengriya bilan 2:2 hisobida durang o‘ynagani sabab bo‘ldi. 10 turdan so‘ng O‘zbekiston Hindistondan bir ochko oldinda edi — 18 ochkoga qarshi 17 ochko.
Musobaqa yakuniga ko‘ra, Hindiston 18 ochko bilan ikkinchi o‘rinni egalladi. Germaniya ham 18 ochko jamg‘ardi va Niderlandiya ustidan 2,5:1,5 hisobida g‘alaba qozonib, uchinchi o‘rinni egalladi.
O‘zbekiston uchun bu 2022 yilda Chennayda o‘tkazilgan Olimpiadadagi g‘alabadan keyingi ikkinchi olimpiya oltini bo‘ldi. 2024 yilda Budapeshtda o‘tkazilgan Olimpiadada esa terma jamoa bronza medallarini qo‘lga kiritgan.
Shu tariqa, O‘zbekiston so‘nggi uchta shaxmat Olimpiadasining ikkitasida chempion bo‘ldi va bir marta uchinchi o‘rinni egalladi.
Samarqandda O‘zbekiston terma jamoasi tarkibida Javohir Sindarov, Nodirbek Abdusattorov, Nodirbek Yakubboyev, Shamsiddin Vohidov va Muhiddin Madaminov ishtirok etdi. Jamoa kapitani sobiq jahon chempioni Rustam Qosimjonov bo‘ldi.
Musobaqa boshida O‘zbekiston dastlabki yetti turning barchasida g‘alaba qozondi. Hal qiluvchi uchrashuvlarda terma jamoa Hindistonni 2,5:1,5, Xitoyni esa 3:1 hisobida mag‘lub etdi. Sakkizinchi turda o‘zbekistonlik shaxmatchilar Germaniyaga mag‘lub bo‘ldi, biroq keyin AQSH ustidan 2,5:1,5 hisobida va Armaniston ustidan 3,5:0,5 hisobida g‘alaba qozondi.
