O‘zbekiston fuqarolari Qirg‘izistonga ko‘chsa, pensiyasi saqlanadi
Toshkent, O’zbekiston (UzDaily.uz) — O‘zbekistondan Qirg‘izistonga doimiy yashash uchun ko‘chib o‘tgan fuqarolarga tayinlangan pensiyalarni to‘lashni davom ettiradi.
Bu O‘zbekiston Hukumati va Qirg‘iziston Vazirlar Mahkamasi o‘rtasida 30 iyul kuni Cho‘lpon-Ota shahrida imzolangan davlat ijtimoiy sug‘urtasi va pensiya taʼminoti to‘g‘risidagi bitimda nazarda tutilgan. Bu haqda O‘zbekiston Pensiya jamg‘armasi xabar berdi.
Yangi kelishuvlarga ko‘ra, pensionerning O‘zbekistondan Qirg‘izistonga ko‘chib o‘tishi endi O‘zbekiston pensiyasini to‘lashni to‘xtatish uchun asos bo‘lmaydi. Pensiya jamg‘armasi bo‘lim boshlig‘i Alisher Rasulovning tushuntirishicha, fuqaro Qirg‘izistonda bank hisob raqamini ochib, uni O‘zbekistonga taqdim etishi mumkin. Shundan so‘ng pensiya mazkur hisob raqamiga o‘tkazib beriladi.
Bitim, shuningdek, har ikki davlatda mehnat qilgan fuqarolarni pensiya bilan taʼminlash tartibini belgilaydi. Tomonlar mutanosiblik tamoyilini qo‘llashga kelishib oldi. Unga ko‘ra, har bir davlat o‘z hududida orttirilgan mehnat staji va olingan ish haqidan kelib chiqib, pensiya tayinlaydi va to‘laydi.
Shunday qilib, agar fuqaroning O‘zbekiston va Qirg‘izistonda mehnat staji mavjud bo‘lsa, har bir davlat tegishli ish davri uchun pensiya to‘lovlari bo‘yicha majburiyatni o‘z zimmasiga oladi. Bunda bitim mehnat stajini o‘zaro hisobga olishni ham nazarda tutadi.
Yangi kelishuvlar, shuningdek, 1992 yilda Mustaqil Davlatlar Hamdo‘stligi ishtirokchi davlatlari fuqarolarining pensiya taʼminoti sohasidagi huquqlarini kafolatlash to‘g‘risidagi xalqaro bitimni qo‘llash bilan bog‘liq qator masalalarni hal etishga qaratilgan. Xususan, tomonlar mehnat stajini o‘zaro hisobga olishning ikki tomonlama tartibini belgiladi.
Bitim O‘zbekiston Prezidenti Shavkat Mirziyoyevning Qirg‘izistonga davlat tashrifi doirasida imzolandi. Qirg‘iziston Prezidenti Sadir Japarovning taklifiga binoan O‘zbekiston rahbari 30 iyul — 1 avgust kunlari mamlakatda bo‘ldi.
Oliy darajadagi muzokaralar davomida prezidentlar do‘stlik, yaxshi qo‘shnichilik va strategik sheriklik munosabatlarini yana-da mustahkamlash masalalarini muhokama qildi. Kun tartibidan o‘zaro savdoni oshirish, sanoat kooperatsiyasini kengaytirish, transport bog‘liqligini rivojlantirish hamda madaniy-gumanitar hamkorlik masalalari ham o‘rin oldi.
Bitim kuchga kirishi uchun tomonlar zarur ichki tartib-taomillarni amalga oshirishi va hujjatni ratifikatsiya qilishi kerak.
Alisher Rasulovning so‘zlariga ko‘ra, kelgusida O‘zbekiston MDH davlatlari va yaqin xorij mamlakatlari, jumladan, Turkiya, Ozarbayjon, Tojikiston, Qozog‘iston va Turkmaniston bilan ham shunga o‘xshash bitimlar tuzish bo‘yicha muzokaralar o‘tkazishni rejalashtirmoqda.
