Andijonda Soliq Mobile orqali 38,3 mlrd so‘m talon-toroj qilingani fosh etildi

Toshkent, O’zbekiston (UzDaily.uz) — Andijon viloyatida huquqni muhofaza qiluvchi organlar Soliq Mobile ilovasidan foydalangan holda byudjet mablag‘larini talon-toroj qilish sxemasini fosh etdi. Bosh prokuratura huzuridagi departament matbuot xizmati maʼlumotiga ko‘ra, davlatga yetkazilgan zarar 38,3 mlrd so‘mni tashkil etgan.

Mutaxassislar aniqlashicha, bir necha nafar fuqaro beshta kompaniya nomidan soxta elektron hisobvaraq-fakturalar rasmiylashtirib, boshqa yuridik shaxslarga mavjud bo‘lmagan tovarlar yetkazib berilganini aks ettirgan. Ushbu soxta operatsiyalarning umumiy qiymati 2,2 trln so‘mni tashkil qilgan.

Tergov versiyasiga ko‘ra, gumonlanuvchilar tovarlar sotilgani haqidagi tasavvurni hosil qilish va kassa cheklarini shakllantirish maqsadida mablag‘larni nazorat-kassa mashinalari orqali o‘tkazgan.

Natijada Soliq Mobile ilovasi orqali 94 921 nafar fuqaro hamda ijtimoiy himoya reyestriga kiritilgan shaxslarning hisob raqamlariga keshbek ko‘rinishida mablag‘lar o‘tkazilgan. Tergov maʼlumotlariga ko‘ra, shu yo‘l bilan 38,3 mlrd so‘m miqdoridagi byudjet mablag‘lari o‘zlashtirilgan va talon-toroj qilingan.

Mazkur holat yuzasidan O‘zbekiston Respublikasi Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar, blanklarni tayyorlash, qalbakilashtirish, ularni o‘tkazish yoki foydalanish) bilan jinoyat ishi qo‘zg‘atildi. Ayni paytda tergov harakatlari olib borilmoqda.