Тошкент, Ўзбекистон (UzDaily.uz) — Япония иммиграция органлари мамлакат ҳудудида ноқонуний бўлиб турган Ўзбекистоннинг бир нафар фуқаросини юртимизга депортация қилди. Бу ҳақда Япониянинг Ўзбекистондаги элчихонаси хабар берди.
Дипломатик ваколатхона маълумотларига кўра, фуқаро Японияга қисқа муддатли виза билан кирган, бироқ рухсат этилган бўлиш муддати тугаганидан кейин ҳам мамлакатни тарк этмаган. Кейинчалик у Япония ҳуқуқни муҳофаза қилувчи органлари томонидан қўлга олиниб, ҳибсга олинган.
Элчихона миграция қоидаларини бузиш, жумладан, мамлакатда ноқонуний бўлиш ва рухсатсиз меҳнат фаолияти билан шуғулланиш учун қатъий чоралар белгиланганини эслатди. Бундай чоралар полиция томонидан ҳибсга олиш, иммиграция марказида сақлаш ва кейинчалик депортация қилишни ўз ичига олиши мумкин.
Дипломатик ваколатхона, шунингдек, Япония томони аниқланган қоидабузарлар ҳақидаги маълумотларни Ўзбекистон ҳукуматига тақдим этишини огоҳлантирди. Шу сабабли бундай фуқаролар ватанга қайтганидан кейин уларга нисбатан тегишли чоралар кўрилиши мумкин.
Элчихона фуқароларни белгиланган талабларга риоя қилмасдан Японияда ишга жойлашиш имконияти ҳақидаги шубҳали таклифларга ишонмасликка ҳамда сафар шартларини синчковлик билан текширишга чақирди.
Баёнотда қочқин мақомини олиш учун ариза топшириш Японияда бўлиш муддатини узайтириш ёки ишлашга рухсат олиш усули сифатида қўлланилиши мумкин эмаслиги ҳам алоҳида тушунтирилган. Элчихона маълумотига кўра, бундай мақсадларда ушбу мақомни сўраб мурожаат қилишга йўл қўйилмайди.
Қочқин мақомини бериш рад этилган тақдирда, ариза берувчи иммиграция марказига жойлаштирилиши ва депортация қилиниши мумкин.
Бундан ташқари, ариза топшириш жараёнида била туриб ёлғон маълумот тақдим этиш ёки фирибгарлик схемаларидан фойдаланиш жиддий ҳуқуқий оқибатларга олиб келиши мумкин.
