7
Молия

ХВЖ Ўзбекистон учун пенсия ислоҳотини устувор вазифа деб атади

ХВЖ Ўзбекистон учун пенсия ислоҳотини устувор вазифа деб атади
ХВЖ Ўзбекистон учун пенсия ислоҳотини устувор вазифа деб атади

Тошкент, Ўзбекистон (UzDaily.uz) — Халқаро валюта жамғармаси (ХВЖ) пенсия ислоҳотини Ўзбекистон иқтисодиёти ва молия бозорини янада ривожлантириш учун зарур бўлган асосий йўналишлардан бири деб ҳисоблайди. ХВЖнинг мамлакатдаги доимий вакили Коба Гвенетадзенинг таъкидлашича, ислоҳот учун зарур ҳужжатлар тайёрланган бўлса-да, амалда у ҳали бошланмаган. Бу ҳақда у Ўзбекистон Марказий банкида бўлиб ўтган минтақавий иқтисодий прогноз тақдимотида маълум қилди.

Мамлакатда ислоҳотларнинг биринчи босқичи якунланганидан кейин иқтисодий ўсишнинг янги моделини муҳокама қилиш жараёнида пенсия тизими масаласи ҳам кўтарилди.

Жаҳон банкининг Тошкентдаги катта иқтисодчиси Пинар Яшарнинг таъкидлашича, аввалги ўзгаришлар нисбатан аниқ вазифалар билан боғлиқ бўлган. Улар қаторига валюта курси ва нархларни либераллаштириш, шунингдек, мавжуд тўсиқларни бартараф этиш киради.

Унинг сўзларига кўра, иқтисодий ўсишга тўсқинлик қилаётган асосий омилларни кейинги босқичда аниқлаш анча мураккаб вазифага айланади.

Гвенетадзе янада чуқур ўзгаришларни талаб қиладиган бир нечта йўналишни санаб ўтди. Улар орасида меҳнат бозори, таълим, энергетика, рақамлаштириш ва сунъий интеллект бор.

ХВЖ вакили пенсия тизимига алоҳида тўхталди.

«Макроиқтисодиёт учун аҳамиятга эга бўлган ва айни вақтда молия секторини ривожлантириш учун ҳам муҳим ҳисобланган йўналишлардан бири — пенсия ислоҳотидир. Аслида, у ҳали бошланмаган, аммо унинг учун асос яратадиган ҳужжатлар аллақачон мавжуд. Бу йўналишни ҳам ривожлантириш зарур», — деди у.

Гвенетадзе, шунингдек, макроиқтисодий барқарорлик ислоҳотларни амалга оширишнинг ўзгармас шарти бўлиб қолиши кераклигини таъкидлади. Унинг сўзларига кўра, макроиқтисодий барқарорлик мамлакатга турли иқтисодий зарбаларни енгиб ўтишда ёрдам беради.

Пенсия тизимининг молия бозори ривожланиши билан боғлиқ жиҳатларига Марказий банк раисининг ўринбосари Нодирбек Ачилов ҳам тўхталди.

Унинг маълум қилишича, Иқтисодиёт ва молия вазирлигининг миллий валютадаги қарз маблағларини жалб қилиш қиймати сезиларли даражада пасайган. Апрель ойида сўмда жойлаштирилган облигациялар даромадлилиги 12,25 фоизни ташкил этган бўлса, ҳозирда бу кўрсаткич тахминан 9 фоиз даражасида.

Ачиловнинг сўзларига кўра, пасайиш омилларидан бири Ўзбекистоннинг GBI индексига киритилиши бўлган.

У, шунингдек, халқаро молия институтлари ички бозорда сўмдаги облигацияларни чиқаришни режалаштираётганини қайд этди. Капитал бозори ривожланиб бориши билан мамлакат ичида мавжуд бўлган молиявий ресурслар ҳажми ҳам ортиб боради.

Жаҳон амалиётида жамғариб бориладиган пенсия тизимлари узоқ муддатли молиялаштириш манбаларидан бири ҳисобланади. Бундай фондлар маблағларни миллий валютадаги давлат ва корпоратив облигацияларга инвестиция қилиши мумкин. Бу эса узоқ муддатли қимматли қоғозларга бўлган талабни таъминлайди.

 

 

 

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.