Халқаро инвесторлар Ўзбекистон молия бозорини ўрганди

Тошкент, Ўзбекистон (UzDaily.uz) — Йирик халқаро институционал инвесторлар вакиллари Ўзбекистон Иқтисодиёт ва молия вазирлиги билан мамлакат ички молия бозорида ишлаш истиқболларини муҳокама қилди.

Вазир маслаҳатчиси Жасур Қаршибоев билан учрашув 4 сентябрь куни бўлиб ўтди.

Музокараларда Финляндия Давлат пенсия жамғармаси, Ilmarinen, Elo ва Veritas пенсия ҳамда суғурта компаниялари, шунингдек, SOKA-BAU ва Aktia Bank Oyj вакиллари иштирок этди.

Учрашувнинг асосий мавзуларидан бири хорижий инвесторларни Ўзбекистон давлат ғазначилик облигациялари бозорига жалб қилиш имконияти бўлди. Хорижий томон ушбу сегментга чиқишдан манфаатдор эканини билдирди. Шундан сўнг иштирокчилар ички молия бозорининг салоҳияти ва уни янада ривожлантириш масалаларини муҳокама қилди.

Иқтисодиёт ва молия вазирлиги вакиллари Ўзбекистон иқтисодиётининг жорий ҳолати, таркибий ўзгаришлар ва амалга оширилаётган иқтисодий ислоҳотлар ҳақида маълумот берди. Шунингдек, мамлакатни келгусида ривожлантириш истиқболлари ҳақида фикр билдирилди.

Халқаро инвесторлар амалга оширилаётган ўзгаришлар, ички молия бозорини шакллантириш ва ривожлантириш бўйича кўрилаётган чора-тадбирларни ижобий баҳолади.

Учрашувда мамлакатнинг кредит профилини мустаҳкамлаш масалаларига алоҳида эътибор қаратилди. Томонлар Ўзбекистоннинг суверен кредит рейтингини янада ошириш ва инвестицион даражага эришиш истиқболларини кўриб чиқди.

Бундан ташқари, иштирокчилар давлат қарзини бошқариш ёндашувлари, миллий валютада молиялаштиришни жалб қилиш имкониятларини кенгайтириш ва ички капитал бозорини янада ривожлантириш масалаларини муҳокама қилди.

Иқтисодиёт ва молия вазирлигида таъкидланишича, халқаро институционал инвесторлар билан ҳамкорлик молия бозорининг жорий имкониятларинигина эмас, балки уни янада ривожлантириш масалаларини ҳам қамраб олади.