Тошкент, Ўзбекистон (UzDaily.uz) — Венгрия мудофаа вазири Криштоф Салай-Бобровницки расмий ташриф билан Ўзбекистонга келди. Ўзбекистон Республикаси мудофаа вазири генерал-майор Шуҳрат Холмуҳаммедов билан ўтказилган музокаралар якунида томонлар мудофаа соҳасидаги икки томонлама ҳамкорликни янада мустаҳкамлашга асос бўладиган қўшма декларацияни имзоладилар. Бу ҳақда Венгрия Мудофаа вазирлиги матбуот хизмати хабар берди.

Венгрия мудофаа вазирининг таъкидлашича, Марказий Осиё — хавфсизлик ва иқтисодий нуқтаи назардан Европа учун стратегик аҳамиятга эга ҳудуддир. У Тошкентга ташрифнинг алоҳида аҳамиятга эга эканини, бу эса Венгрия манфаатларига мос равишда Шарқ ва Ғарб ўртасидаги алоқаларни мустаҳкамлашга хизмат қилишини қайд этди.

«Томонлар мудофаа сиёсатидаги устувор йўналишлар ва ҳарбий ҳамкорликни ривожлантириш йўлларини муҳокама қилдилар. Имзоланган декларация ҳарбий таълим ва кадрлар тайёрлаш соҳасида ҳамкорлик қилиш имкониятини очади», — деди Криштоф Салай-Бобровницки.

Вазир, шунингдек, Марказий Осиёда барқарорлик Венгрия хавфсизлиги учун муҳим омил эканини таъкидлади. 2023 йилдан бошлаб Венгриянинг Ўзбекистондаги элчихонаси НАТОнинг алоқа нуқтаси (CPE) вазифасини бажармоқда, бу эса Альянс билан ҳамкорликни кучайтирмоқда. Ўзбекистон эса минтақа бўйича терроризмга қарши курашда муҳим ҳамкор сифатида иштирок этмоқда.

Ташриф доирасида томонлар Россия-Украина можаросини тез фурсатда тугатиш зарурлиги борасида умумий фикр билдирдилар ҳамда АҚШнинг тинчлик ўрнатиш ташаббусларини қўллаб-қувватлаш аҳамиятини таъкидладилар.

Делегация дастуридан Буюк Ватан уруши даврида Венгрия ҳарбий асирлари хотирасига ўрнатилган ёдгорлик, Ўзбекистон Қуролли Кучлар академияси, Инновацион технологиялар маркази ва Чимғондаги ҳарбий полигонни зиёрат қилиш ўрин олди. Венгрия мудофаа вазири Ўзбекистоннинг мудофаа технологиялари ва ҳарбий кадрлар тайёрлаш соҳасидаги ютуқлари билан танишди.