Тошкент, Ўзбекистон (UzDaily.uz) — Uzum Market маркетплейси техник носозликдан сўнг веб-сайти, мобил иловаси ва сотувчилар учун шахсий кабинет фаолиятини қайта тиклади. Компания маълум қилишича, харидорлар яна одатдаги тартибда буюртмаларни расмийлаштиришлари мумкин.
Омборда буюртмаларни йиғиш жараёни давом этмоқда, мамлакат бўйлаб буюртмаларни олиб кетиш пунктлари эса штат режимида ишлаяпти. Шу билан бирга, буюртмаларни олиб кетиш пунктларида сақлаш муддатлари узайтирилди.
Компания фойдаланувчилар ва ҳамкорлар учун аввал эълон қилинган компенсациялар амал қилишини ҳам тасдиқлади.
Техник носозлик сабабли буюртмаларини олиб кета олмаган харидорларга бир ҳафта давомида кейинги харидлар учун промокодлар юборилади. Сотувчилар учун логистика ва сақлаш хизматлари октябрь ойи охиригача бепул бўлади.
Франшиза асосида ишлайдиган буюртмаларни олиб кетиш пунктлари эгаларига эса олинмай қолган фойда қоплаб берилади.
Шу билан бирга, сервиснинг айрим функцияларида ҳозирча хатолар юзага келиши мумкин. Ишлаб чиқиш жамоаси янгиланган инфратузилмани синовдан ўтказиш ва эҳтимолий носозликларни бартараф этишда давом этмоқда.
Компания фойдаланувчиларга сабр-тоқат ва тушуниш билан муносабатда бўлганлари учун миннатдорлик билдирди.
