Тошкент, Ўзбекистон (UzDaily.uz) — Ўзбекистоннинг Uzum технологик компанияси халқаро инвестицияларни, жумладан, АҚШдан сармоя жалб қилишни давом эттиришни режалаштирмоқда. Компания еврооблигациялар бозорига чиқиш имкониятини ҳам кўриб чиқмоқда. Бу ҳақда компания ҳаммуассиси, стратегия ва бизнесни ривожлантириш директори Николай Селезнёв Bloomberg агентлигига берган интервьюсида маълум қилди.
Унинг сўзларига кўра, акцияларни бирламчи оммавий таклиф (IPO) орқали жойлаштириш Uzum стратегиясининг якуний мақсади эмас, балки бизнесни ривожлантириш босқичларидан бири ҳисобланади. Компания Ўзбекистоннинг биринчи оммавий технологик компаниясига айланишни ва шу асосда ўз стратегиясини амалга оширишни давом эттиришни мақсад қилган.
Селезнёв Ўзбекистон ва Uzum турли мамлакатлардан капитал жалб қилиш имкониятига эга эканини таъкидлади. Унинг айтишича, сўнгги 18 ой ичида компания Хитой, АҚШ ва Форс кўрфази мамлакатларидан инвестициялар олган.
Унинг баҳолашича, Хитойнинг Tencent компанияси Uzum капиталида иштирок этаётгани АҚШ ва Хитой ўртасидаги кескинлик шароитида америкалик инвесторларни жалб қилишга тўсқинлик қилмаслиги керак.
Интервьюда компания бизнесининг кредитлаш йўналишини молиялаштириш масаласига ҳам алоҳида эътибор қаратилди.
Селезнёвнинг маълум қилишича, ушбу сегментни кенгайтириш катта миқдордаги маблағни талаб қилади. Бироқ компания зарур капитални жалб қилиш имкониятларини кўрмоқда.
Унинг сўзларига кўра, Ўзбекистон ички бозорида ишончли эмитентларга, айниқса, миллий валютада қарз молиявий инструментларини жойлаштиришда талаб юқори бўлиб қолмоқда.
Бундан ташқари, Uzum ривожланиш банкларидан ҳам молиялаштириш жалб қилмоқда. Яқинда компания Евроосиё тараққиёт банки билан ҳамкорликда кредитлаш ҳажмини оширишини эълон қилган.
Еврооблигациялар чиқариш ҳам компания кўриб чиқаётган вариантлардан бири бўлиб қолмоқда. Селезнёв бу масалага 2026 йил охири ёки 2027 йил бошида яна қайтилиши мумкинлигини айтди.
