Узбекистонда ССП ҳузурида Юристлар ассоциацияси ташкил этилди

Тошкент, Ўзбекистон (UzDaily.uz) — Ўзбекистон Савдо-саноат палатаси ҳузурида мамлакат юридик соҳаси вакилларини бирлаштирувчи янги профессионал платформа — Адвокатлар ва юридик маслаҳатчилар ассоциацияси расман ташкил этилди.

Ташкилотчилар қарорига кўра, Ассоциация раиси этиб адвокат, Жамоатчилик кенгаши аъзоси Давронбек Ахматов тайинланди.

Тузилмани ташкил этиш адвокатлар, юридик маслаҳатчилар ва бизнес ҳамжамияти ўртасидаги ҳамкорликни мустаҳкамлаш, шунингдек, ҳуқуқ ва тадбиркорлик соҳасида ягона профессионал мулоқотни ривожлантиришга қаратилган.

Қайд этилишича, Ассоциация фаолияти адвокатлар, юристлар ва юридик консалтинг компаниялари вакиллари иштирокида очиқ муҳокамаларни йўлга қўйиш билан бирга олиб борилади.

Бундай мулоқотлар доирасида адвокатлик амалиётининг долзарб масалалари, тадбиркорларнинг ҳуқуқий ҳимояси, шунингдек, суд ва ҳуқуқни қўллаш тизимидаги мавжуд ноаниқликларни кўриб чиқиш режалаштирилган.

Янги платформа Ўзбекистонда юридик хизматлар сифати ошишига ва бизнеснинг ҳуқуқий қўллаб-қувватланишини кучайтиришга хизмат қилиши кутилмоқда.