Тошкент, Ўзбекистон (UzDaily.uz) — 2027–2028 йилларда Ўзбекистон Миллий инвестиция жамғармаси портфелидаги тўртта йирик компания ва битта банк акцияларини IPO орқали биржага чиқариш режалаштирилмоқда. Рўйхатдан «Uzbekistan Airways» АЖ, «Ўзбекистон миллий электр тармоқлари» АЖ, «Ўзбекгидроэнерго» АЖ, «Ўзбектелеком» АЖ ҳамда «Ўзсаноатқурилишбанк» АТБ (SQB) ўрин олган. Бу ҳақда Ўзбекистон Республикаси Иқтисодиёт ва молия вазирлиги хабар берди.
Ушбу компаниялар авиация, энергетика, гидроэнергетика, телекоммуникация ва банк соҳаларини ифодалайди. Айни пайтда уларни трансформация қилиш ва халқаро капитал бозорларига чиқишга тайёрлаш ишлари олиб борилмоқда.
Миллий инвестиция жамғармасининг ўзи 2026 йил 18 май куни IPO ўтказган. Лондон ва Тошкент фонд биржаларида жамғарма акцияларининг 35,45 фоизи 692 млн долларга жойлаштирилган. Давлат бюджетига 660 млн доллардан ортиқ маблағ келиб тушган.
Жамғарма акцияларига бўлган талаб таклиф ҳажмидан тўрт баравар юқори бўлган. Халқаро бозорда талаб 2,9 млрд доллардан ошган, Тошкент фонд биржасида эса 260 млрд сўмдан зиёдни ташкил этган.
14 октябрь куни Тошкентда жамғарма томонидан Investors Day тадбири ўтказилди. Унда инвестиция портфелларининг умумий қиймати 2,5 трлн доллардан ошадиган 250 нафардан ортиқ хорижий инвестор иштирок этди. Вазирлик маълумотларига кўра, иштирокчиларнинг 40 фоизини жамғарманинг амалдаги акциядорлари, 60 фоизини эса янги инвесторлар ташкил этган.
16 октябрь куни Тошкентда Corporate Governance Day 2026 тадбири бўлиб ўтди. Унда иштирокчилар жамғарма портфелидаги компанияларда корпоратив бошқарувни такомиллаштиришнинг олтита устувор йўналишини белгилаб олдилар.
Улар қаторига МҲХС (Молиявий ҳисоботнинг халқаро стандартлари) асосида сифатли молиявий ҳисобот тайёрлаш, корпоратив тақвимга риоя қилиш ва KPI кўрсаткичлари тизимини қайта кўриб чиқиш киради. Шунингдек, узоқ муддатли молиявий моделларни ишлаб чиқиш, корпоратив бошқарувнинг асосий функцияларини кучайтириш ҳамда компаниялар қийматини ошириш стратегияси ҳам устувор вазифалар сифатида белгиланган.
