Тошкент, Ўзбекистон (UzDaily.uz) — «Uzbekistan Airways» таркибий бўлинмаси бўлган «Uzbekistan Airways Technics» МЧЖ (UAT) 2026 йил сентябрь ойида Европа авиация хавфсизлиги агентлиги (EASA) томонидан ўтказилган назорат аудитини муваффақиятли якунлаб, Европа стандартининг Part-145 талабларига мувофиқлигини тасдиқлади.
Ўтказилган аудит UATнинг ҳаво кемаларига техник хизмат кўрсатиш тизими, ишлаб чиқариш жараёнлари ва сифат стандартлари Европа авиация соҳасида белгиланган талабларга мувофиқ эканини тасдиқлади.
Компанияда таъкидланишича, мазкур натижа ходимларнинг белгиланган тартиб-таомилларга риоя қилиши, профессионал компетенцияларни сақлаб қолиши ва иш жараёнларини узлуксиз такомиллаштиришни ўз ичига олган доимий фаолияти натижаси бўлди.
EASA Part-145 талабларига мувофиқлик Uzbekistan Airways Technicsнинг ҳаво кемаларига техник хизмат кўрсатиш халқаро бозоридаги мавқеини мустаҳкамлайди ҳамда ҳамкорликни ривожлантириш учун қўшимча имкониятлар яратади.
UATда компания мутахассисларининг салоҳиятини ривожлантириш ва авиация соҳасининг замонавий талабларини инобатга олган ҳолда кўрсатилаётган хизматлар сифатини янада такомиллаштиришни давом эттириши таъкидланди.
Uzbekistan Airways компанияси Uzbekistan Airways Technics жамоасини назорат аудитини муваффақиятли якунлагани билан табриклаб, бўлинма ходимларининг профессионаллигини қайд этди.
