Uzautotrans 8 июндан Тошкент–Чўлпонота рейсини йўлга қўяди

Тошкент, Ўзбекистон (UzDaily.uz) — 8 июндан бошлаб Uzautotrans Service компанияси Тошкент – Чўлпонота (Иссиқкўл кўли) йўналиши бўйича мавсумий автобус қатновини йўлга қўяди. Бу ҳақда Ўзбекистон Транспорт вазирлиги матбуот хизмати хабар қилди.

Маршрут туристик мавсум давомида Тошкент шаҳри билан Чўлпонота курорт ҳудуди ўртасида йўловчиларга хизмат кўрсатади. Рейслар «Тошкент» автовокзалидан жуфт саналарда, Чўлпонотадан қайтиш рейслари эса тоқ саналарда амалга оширилади.

Автобусларнинг Тошкентдан жўнаши соат 15:00 га белгиланган. Йўловчи ташиш хизматлари компания тасарруфидаги Yutong русумли автобусларда амалга оширилади.

Ушбу йўналиш бўйича чипта нархи 365 минг сўмни ташкил этади.