Учта фармацевтика компанияси нархларни асоссиз оширган маблағларни қайтарди

Тошкент, Ўзбекистон (UzDaily.uz) — Рақобатни ривожлантириш қўмитаси маълум қилишича, учта фармацевтика компанияси дори воситалари нархларини асоссиз ошириш орқали олинган маблағларни ихтиёрий равишда қайтарган.

Қайтарилган маблағларнинг умумий ҳажми қарийб 100 миллион сўмни ташкил этди.

Идора маълумотига кўра, қонунбузилишлар Fair Tech ягона ахборот тизими орқали келиб тушган маълумотлар таҳлили давомида аниқланган. Текширув натижасида NIKA PHARM, Astor Alliance ва EVRO FARM BIZNES компаниялари томонидан белгиланган нархларга риоя этилмагани маълум бўлган.

Хусусан, NIKA PHARM «Гастромег Эзо (Nika Pharm)» 40 мг №20 капсулаларини, Astor Alliance «Долгит» 50 г кремини ва «Мезим Ф 10000» №20 таблеткаларини, EVRO FARM BIZNES эса 100 мл ҳажмдаги «Бровенсин (World Medicine)» сиропини белгиланган талабларга зид равишда сотган.

Қўмитада қайд этилишича, Солиқ қўмитасидан асоссиз олинган даромад мавжудлиги ҳақидаги маълумотлар ўрганилганидан сўнг компаниялар аниқланган қонунбузилишларни ихтиёрий равишда бартараф этган ҳамда ортиқча олинган маблағларни қайтариш чораларини кўрган.

Рақобатни ривожлантириш қўмитаси фармацевтика бозори иштирокчиларини қонунчилик талабларига риоя қилишга, Fair Tech ахборот тизими орқали қўлланилаётган савдо устамаларини мунтазам таҳлил қилиб боришга ҳамда қонунбузилишлар аниқланган тақдирда уларни ихтиёрий равишда бартараф этишга чақирди.