Тошкент, Ўзбекистон (UzDaily.uz) — Ўзбекистон Транспорт вазирлиги ижтимоий тармоқларда аккаунтлар, тўловлар ва хабарномаларни олиш билан боғлиқ муаммолар ҳақида тарқалаётган хабарлар фонида ATTO иловасининг ишлаш хусусиятларини тушунтирди.
Вазирлик маълум қилишича, фойдаланувчиларнинг шахсий маълумотларини ҳимоя қилиш ва тўлов операциялари хавфсизлигини таъминлаш мақсадида битта ATTO аккаунтидан бир вақтнинг ўзида фақат битта қурилмада фойдаланиш мумкин.
Аккаунтга бошқа қурилмадан кирилганда, аввалги қурилмадаги сессия автоматик равишда якунланади.
Транспорт вазирлигида таъкидланишича, бундай тартиб аккаунтлар хавфсизлигини ошириш ва тўлов операцияларининг тўғри амалга оширилишини таъминлашга қаратилган.
Тўловлар ҳақидаги маълумотларни янгилаш ва хабарномаларни етказиб бериш тезлиги интернет уланишининг барқарорлигига боғлиқ бўлиши мумкин.
Шу муносабат билан юзага келадиган техник ҳолатлар индивидуал тартибда кўриб чиқилиши талаб этилади.
ATTO иловаси орқали тўловларни амалга оширишда техник носозликлар ёки саволларга дуч келган фойдаланувчилар +998 78 140 08 08 телефон рақами орқали қўллаб-қувватлаш хизматига мурожаат қилишлари мумкин.
Қўллаб-қувватлаш хизмати мутахассислари мурожаатлар асосида тегишли операцияларни текширади ҳамда ҳар бир аниқ ҳолат бўйича маълумот ва тушунтиришлар беради.
Транспорт вазирлиги жамоат транспортида рақамли тўлов хизматларидан барқарор, хавфсиз ва қулай фойдаланишни таъминлаш бўйича ишларни давом эттираётганини маълум қилди.
