Тошкент, Ўзбекистон (UzDaily.uz) — Ўзбекистон Президенти Администрацияси раҳбари Саида Мирзиёева «Ўзбекфильм» киностудиясига ташриф буюриб, унинг жорий ҳолати ва фаолияти билан танишди. У киностудияни миллий бренд ва мамлакат замонавий киноиндустриясининг таянч марказига айлантириш зарурлигини таъкидлади.
Саида Мирзиёеванинг сўзларига кўра, «Ўзбекфильм» нафақат суратга олиш майдони, балки қарийб бир аср давомида ўзбек халқининг тарихи, тақдири ва кечинмаларини акс эттириб келаётган миллий кинематографиянинг асосий марказларидан бири ҳисобланади.
У соҳани бошқариш тизимини ўзгартиришни асосий вазифалардан бири сифатида қайд этди. Унинг таъкидлашича, давлат ижодий жараёнга аралашадиган буюртмачи сифатида эмас, балки киноиндустрияни ривожлантириш ва молиявий қўллаб-қувватлаш учун шароит яратадиган стратегик ҳамкор сифатида иштирок этиши керак.
Бунда соҳанинг асосий ҳаракатлантирувчи кучлари хусусий киностудиялар, мустақил продюсерлар ва муаллифлар бўлиши лозим.
Кино маҳсулотларини ишлаб чиқаришдан тортиб, уни томошабинга етказишгача бўлган бутун занжирни, жумладан, молиялаштириш, дистрибуция, прокат, халқаро фестивалларда иштирок этиш ва экспорт жараёнларини модернизация қилиш режалаштирилмоқда. Шунингдек, миллий кинематография меросини сақлаш, реставрация қилиш ва рақамлаштириш тизимини мустаҳкамлаш, мутахассислар тайёрлаш ва халқаро тажриба алмашиш имкониятларини кенгайтириш кўзда тутилмоқда.
Профессионал муҳит ва ўзини ўзи тартибга солиш маданиятини шакллантиришга ҳам алоҳида эътибор қаратилади. Бунда режиссёрлар ва кино маҳсулотларининг бошқа ижодкорлари фикри, тажрибаси ва нуфузи инобатга олинади.
Ташриф якунида Саида Мирзиёева Абу Али ибн Синонинг болалиги ҳақидаги тарихий фильм суратга олинаётган майдонга борди.
У кенг кўламли декорациялар ва ижодий жамоа фаолияти билан танишиб, фильм ижодкорларига муваффақият тилади.
