Шошилинч
7
Иқтисод

Тошкентда Россиянинг 53 та компанияси бизнес-миссия ўтказади

Тошкентда Россиянинг 53 та компанияси бизнес-миссия ўтказади
Тошкентда Россиянинг 53 та компанияси бизнес-миссия ўтказади / Фото: Ўзбекистон Ветеринария ва чорвачиликни ривожлантириш қўмитаси.

Тошкент, Ўзбекистон (UzDaily.uz) — 18–20 ноябрь кунлари Тошкентда Россиянинг 53 та ишлаб чиқарувчи ва етказиб берувчи компанияси иштирокида бизнес-миссия бўлиб ўтади. Бу ҳақда Ўзбекистон Ветеринария ва чорвачиликни ривожлантириш қўмитаси хабар берди.

Тадбир доирасида ўзбекистонлик импортёрлар, дистрибьюторлар ва савдо корхоналари вакиллари Россия компаниялари билан тўғридан-тўғри B2B музокараларини ўтказиш имкониятига эга бўлади. Иштирокчилар янги ҳамкорларни топиш ва савдо алоқаларини ўрнатиш масалаларини муҳокама қилади.

Россия компаниялари озиқ-овқат ва аграр секторнинг бир қатор йўналишлари бўйича маҳсулотлар ҳамда хизматларни тақдим этади.

Тадбир дастуридан дон ва дуккакли экинлар, ун ва озуқа маҳсулотлари, ўсимлик мойлари ва мойли экинлар, гўшт ҳамда гўшт маҳсулотлари ўрин олган. Шунингдек, сут маҳсулотлари, пишлоқлар ва болалар озиқ-овқати ҳам намойиш этилади.

Алоҳида йўналишлар тайёр озиқ-овқат маҳсулотлари, консерва, соуслар, шарбатлар, ичимликлар, чой, қандолатчилик ва нон-булка маҳсулотларини қамраб олади. Бундан ташқари, иштирокчилар балиқ ва денгиз маҳсулотлари, ўғитлар, агрокимё маҳсулотлари ҳамда логистика хизматларини тақдим этади.

Ўзбекистонлик тадбиркорлар Россия ишлаб чиқарувчилари билан товарлар ассортименти ва етказиб бериш шартларини бевосита муҳокама қилишлари мумкин. Шунингдек, экспорт-импорт шартномаларининг шартларини кўриб чиқиш ҳам режалаштирилган.

Бизнес-миссия ва B2B учрашувларида иштирок этиш учун тадбиркорлар ўз компаниялари ҳақида маълумот тақдим этишлари лозим.

 

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.