Тошкентда 20 килограммдан зиёд гиёҳвандлик воситаси мусодара қилинди

Тошкент, Ўзбекистон (UzDaily.uz) — Тошкент шаҳрида Давлат хавфсизлик хизмати ходимлари 20 килограммдан ортиқ гиёҳвандлик воситасини мусодара қилди. Бу ҳақда ДХХ матбуот хизмати хабар берди.

Сурхондарё вилоятида туғилган 58 ёшли шахснинг вақтинча яшаш жойи кўздан кечирилганда, ҳуқуқни муҳофаза қилувчи органлар ходимлари 13 килограмм 50 грамм опий ва 7 килограмм 137 грамм гашишни аниқлади.

Мазкур ҳолат юзасидан Ўзбекистон Республикаси Жиноят кодексининг 246-моддаси («Контрабанда») ҳамда 273-моддаси («Гиёҳвандлик воситалари, уларнинг аналоглари ёки психотроп моддаларни ўтказиш мақсадида қонунга хилоф равишда тайёрлаш, олиш, сақлаш ва улар билан боғлиқ бошқа ҳаракатлар, шунингдек уларни ўтказиш») билан жиноят иши қўзғатилди.

Ҳозирги вақтда гумонланувчининг эҳтимолий шерикларини, шунингдек мусодара қилинган гиёҳвандлик воситаларининг келиб чиқиш манбаларини аниқлашга қаратилган тергов ҳаракатлари олиб борилмоқда.