Тошкент ва Камчатка ҳамкорликни кенгайтириш истиқболларини муҳокама қилди
Тошкент, Ўзбекистон (UzDaily.uz) — Тошкент шаҳар ҳокимлигида Россия Федератсиясининг Камчатка ўлкаси ҳукумати раисининг ўринбосари Юлия Морозова бошчилигидаги делегация билан учрашув бўлиб ўтди.
Музокарада Тошкент шаҳар ҳокимининг биринчи ўринбосари Бахтиёр Раҳмонов, ҳоким ўринбосари Шароф Рахманов, "Тошкент Инвест" компанияси вакиллари ҳамда бошқа мутасаддилар иштирок этди.
Учрашувда импорт ва экспорт, маданий ва таълим алмашинуви, сайёҳлик, иқтисодиёт ва озиқ-овқат таъминоти каби муҳим соҳаларда ҳамкорликни ривожлантириш истиқболлари муҳокама қилинди.
Ўзбекистондан мева-сабзавот маҳсулотлари экспортини ҳамда Камчатка ўлкасидан денгиз маҳсулотлари ва балиқ етказиб бериш ҳажмини ошириш масалаларига алоҳида эътибор қаратилди.
Учрашув ҳар икки томоннинг ишбилармонлик ва маданий алоқаларни мустаҳкамлашга интилишини намоён этди, бу эса қўшма лойиҳаларни амалга ошириш учун янги имкониятлар яратади.
